Shymkentte «Qoǵamdyq kelisim» KKM burynǵy dırektoryna qatysty úkim shyqty

ShYMKENT. QazAqparat - Shymkent qalasy Ál-Farabı aýdandyq sotynda Túrkistan oblysy ákimi apparatynyń «Qoǵamdyq kelisim» Kommýnaldyq memlekettik mekemesiniń burynǵy basshysy M-ge jáne sottalýshy J-ǵa qatysty qylmystyq is aıaqtaldy, dep habarlaıdy QazAqparat Shymkent qalalyq sotynyń baspasóz qyzmetine silteme jasap.

Sot otyrysynda sottalýshylar M. jáne J. ózderine asa iri mólsherde senip tapsyrylǵan bóten múlikti ıemdenip alǵandary anyqtaldy.

Sot úkimimen sottalýshy M. Qylmystyq kodekstiń 189-baby 4-bóligi 2) tarmaǵy boıynsha kináli dep tanylyp, 8 jylǵa bas bostandyǵynan aıyrý jazasy taǵaıyndaldy. Jazany qylmystyq-atqarý júıesiniń ortasha qaýipsiz mekemelerinde óteý belgilendi.

Sottalǵan J. Qylmystyq kodekstiń 28-baby 5-bóligi, 189-baby 4-bóliginiń 2) tarmaǵymen kináli dep tanylyp, 7 jyl merzimge bas bostandyǵynan aıyryldy. Oǵan Qylmystyq kodekstiń 63-baby qoldanylyp, taǵaıyndalǵan jaza shartty dep esepteldi.

Sottalǵan M.-nen «Shymkent qalasynyń turǵyn úı jáne turǵyn úı ınspektsııasy basqarmasy» memlekettik mekemesiniń paıdasyna 29 597 551 teńge óndirildi.

Úkim zańdy kúshine engen joq.