Shymkentte qoǵam qaıratkeri Asanbaı Asqarovty eske alý jıyny ótti
ShYMKENT. QazAqparat - Shymkentte qoǵam qaıratkeri Asanbaı Asqarovty eske alý jıyny ótti. Shym shahardyń kórkeıip, damýyna zor úles qosqan tulǵany úzeńgiles áriptesteri eske alyp, onyń eskertkishine gúl shoqtaryn qoıdy, dep habarlaıdy QazAqparat HAA tilshisi.
Qyrkúıektiń 15-i kúni týǵan Asanbaı Asqarov kózi tiri bolǵanda bıyl 95 jasqa tolar edi. Bul kúni ardaqty azamatpen birge qyzmettes bolǵan el aǵalary onyń esimimen atalatyn kóshe boıyndaǵy eskertkishtiń aldyna jınalyp, mıtıng ótkizdi. Onda sóz alǵan oblystyq ishki saıasat basqarmasynyń basshysy Bolat Tólegen oblystaǵy Asanbaı Asqarovtyń qoltańbasy sanalatyn nysandar men jobalardyń búginde ıgiligin halyq kórip otyrǵanyn tilge tıek ete kele, tarıhta esimi qalǵan mundaı azamattardy el esinen shyǵarmaıtynyn aıtty.
Dara tulǵanyń úzeńgiles dostary da atpal azamat jaıynda estelikter aıtyp, onyń mol murasyn jınaqtap kitap etip shyǵarý isi qolǵa alynyp otyrǵanyn atap ótti. Sondaı-aq bes jyldan soń bolatyn 100 jyldyq toıǵa daıyndyqty osy bastan qolǵa alý kerektigine toqtaldy.
Aıta keteıik, qaıratker Sotsıalıstik Eńbek Eri, talaı jyl Jambyl, Almaty, Ońtústik Qazaqstan oblystary partııa komıtetiniń birinshi hatshysy bolyp jemisti eńbek etken azamat. Ásirese, Ońtústik óńirin basqarǵan shaqta Shymkent qalasynyń kórkeıip, damýyna zor úles qosqanyn jurtshylyq jaqsy biledi. Qalanyń ortalyǵyndaǵy Dendrosaıabaqtyń, zoobaqtyń sondaı-aq taǵy da birqatar nysandardyń salynýyna da kóp eńbek etken. Sekseninshi jyldardyń sońynda oǵan «Jeltoqsan kóterilisin uıymdastyrýǵa qatysty», «ultshyl» degen aıyptar taǵylyp, biraz ýaqyt qamaýda boldy. Alaıda ýaqyt óte kele shyndyqtyń beti ashylyp, qazirgi tańda qaıratkerge zor qurmet kórsetilip keledi.
