Shymkentte kisi ólimine kúdikti retinde sheteldik jumys berýshi qamaýǵa alyndy
Oqıǵa shilde aıynda bolǵan. Qarataý aýdandyq polıtsııa basqarmasyna 15 jastaǵy qyzdyń ata-anasy habarlasyp, ol jumys ornynda elektr toǵynyń soǵýynan qaıtys bolǵany týraly aryzdanǵan. Atalǵan jaıtty polıtsııa qyzmetkerleri Qylmystyq Kodekstiń 156-babymen (Eńbekti qorǵaý qaǵıdalaryn buzý) tirkep, saraptamalar taǵaıyndaǵan.
«Qylmystyq is barysynda kúdikti sheteldik azamat, naqtyraq aıtqanda pákistandyq bolǵandyqtan, tergeý amaldary birshama ýaqytty aldy. Parsy tiliniń aýdarmashy-mamanynyń qatysýymen tergeýshiler barlyq qajetti protsessýaldyq is-áreketterdi júrgizdi. Kúdikti Pákistan azamaty ýaqytsha ustaý ızolıatoryna qamaýǵa alyndy» - delingen Shymkent qalasy polıtsııa departamentiniń resmı ókili taratqan habarlamada.
Sondaı-aq, elektr-tehnıkalyq saraptama nátıjeleri daıyn bolǵan soń, is sotqa joldanatyn bolady.