Shymkentte kireberiste áıel zorlamaq bolǵan kúdikti ustaldy

NUR-SULTAN. QazAqparat – Shymkent polıtseıleri qaladaǵy kóppáterli úılerdiń biriniń kireberisinde áıeldi zorlamaqshy bolǵan kúdiktini ustady. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.

«Polıtsııa qyzmetkerleri kúdiktiniń aty-jónin anyqtaý men ustaý úshin birqatar shara jasady. Sonyń nátıjesinde keshe kúdikti ustaldy. Ol 1985 jyly týǵan jergilikti turǵyn bolyp shyqty. Odan bólek, tergeý amaldaryn júrgizý barysynda kúdiktiniń jábirlenýshiniń qaltasynan 8000 teńgege jýyq aqsha urlaǵany anyqtaldy. Ol óz kinásin tolyq moıyndady», - dedi Nurdildá Oraz mınıstrlikte ótken onlaın brıfıngte.

Qazirgi ýaqytta kúdikti Shymkent qalasy Polıtsııa departamentiniń ýaqytsha ustaý abaqtysyna qamaýly.

«Atalǵan jaıttar boıynsha Qylmystyq kodekstiń 191-babynyń ekinshi bóliginde jáne 120-babynyń birinshi bóliginde kózdelgen, tonaý jáne zorlaýǵa oqtalý boıynsha sotqa deıingi tergep-tekserý amaldary júrip jatyr. Qylmystyq áreketteri dáleldense, segiz jylǵa deıin bas bostandyǵynan aıyrý jazasy kózdelgen. Tergeý amaldary jalǵasýda», - deıdi N. Oraz.

Resmı ókildiń aıtýynsha, ótken aptada jalpy sany 2921 qylmys tirkeldi. Polıtseılerdiń jedel áreket etýi nátıjesinde 1938 qylmys izi sýymaı ashyldy. Onyń ishinde 5 adam óltirý, 34 tonaý men qaraqshylyq, 501 urlyq faktileri áshkere boldy.