Shymkentte kilem jármeńkesi ótýde
ShYMKENT. QazAqparat - Búgin Shymkenttegi «Kórme» ortalyǵynda «Uly dala kilemderi» atty beskúndik kilemder jármeńkesi ashyldy, dep habarlaıdy oblys ákiminiń baspasóz qyzmeti.
Kórmeni tamashalaýǵa Ońtústik Qazaqstan oblysynyń ákimi J.Túımebaev jáne oblysymyzǵa arnaıy jumys saparymen kelgen Iran Islam Respýblıkasynyń Horasan Razavı provıntsııasynyń gýbernatory bastaǵan delegatsııa keldi.
Kórmeniń ashylý saltanatynda sóz alǵan aımaq basshysy Qazaqstandaǵy eń iri «Bal Tekstıl» otandyq kilem óndirýshi fabrıkasy Elbasynyń bastamasymen qurylǵan «Ońtústik» arnaıy ekonomıkalyq aımaǵynda júzege asyrylǵanyn atap ótti.
«Respýblıkadaǵy iri kilem zaýyty toqyma salasyna qosar úlesi mol. Búginde fabrıka aıryqsha oıý-órnektermen árlengen, otandyq kilemniń 2000-nan astam túrlerin oblys turǵyndaryna usynýda. Jobanyń seriktesi - álemdegi eń iri 5 kilem óndirýshilerdiń biri bolyp tabylatyn jáne álemdik naryqta 20 jyldan astam tájirıbesi bar «Kartal Hali» (Túrkııa) kompanııasy», - dedi ákim.
Shymkentte ekinshi ret ótip jatqan kórmeni elimizdegi iri kilem shyǵarýshy «Bal Tekstıl» fabrıkasy uıymdastyrdy. Jármeńkede qonaqtardyń nazaryna 1 myńnan astam kilemder men onyń túrleri usynylýda. Jármeńkede kilem túrlerin arzandatylǵan baǵada satyp alýǵa bolady.
Aıta keteıik, óndiristik qýaty jylyna 5 mln sharshy metr kilem toqýǵa qaýqarly fabrıka iske qosylǵan 2013 jyldan beri 9 mln sharshy metrge jýyq kilem toqysa, osy aralyqta 6 mln keli bolatyn propılen jibin ıirgen.
