Shymkentte kezekti reıd barysynda 4 myńnan asa quqyqbuzýshylyq anyqtaldy

ShYMKENT. QazAqparat - Shymkent qalalyq Patrýldik polıtsııa polkiniń qyzmetkerleri ótkizgen «Qaýipsiz jol» jedel-profılaktıkalyq is-sharasy barysynda 4226 ákimshilik quqyqbuzýshylyq anyqtaldy, dep habarlaıdy QazAqparat tilshisi.

Reıdke shyqqan jol ınspektorlary jol qozǵalysy erejelerin óreskel buzǵandarǵa ákimshilik hattama toltyryp, aıyppul saldy. Shara barysynda kólikti mas kúıde basqarǵan 26 adam anyqtalyp, 258 júrgizýshiniń kóligi tehnıkalyq baıqaýdan ótpegeni belgili bolǵan. Reıs aldyndaǵy mindetti tehnıkalyq jáne medıtsınalyq baıqaýdan ótpegen 25 tulǵaǵa hattama toltyryldy. Sondaı-aq, júrgizýshilerdiń jol ústinde qaýipsizdik beldigin taqpaıtyny jáne rýldi basqarý kezinde uıaly telefon paıdalanatyny anyqtalǵan. Manevr erejesin buzyp, qozǵalystyń qarsy jolaǵyna shyqqandary da ákimshilik jazaǵa tartyldy. Baǵdarshamnyń tyıym salynǵan sıgnalyna ótip ketken 207 jáne jaıaý júrginshige basymdyq bermegen 206 júrgizýshi de aıyppul tóleıtin boldy. Reıd kezinde jaıaý júrginshiler jolaǵynan emes, kez kelgen jerden joldy kesip ótken 657 adamǵa da ákimshilik shara kórilgen. Memlekettik tehnıkalyq baıqaýdan ótpegenderge kólik quralyn basqarýy úshin qaıtadan tekseristen ótýi kerektigi túsindirildi. 162 kólik aıyp turaǵyna qoıyldy.