Shymkentte qazaqtyń batyrlary Tileý Aıtuly men onyń uly Joldyaıaqqa arnalǵan eskertkish ashyldy (FOTO,VIDEO)

ShYMKENT. QazAqparat - Shymkentte qazaqtyń batyrlary Tileý Aıtuly men onyń uly Joldyaıaqqa arnalǵan eskertkish ashyldy. Tas músin Qajymuqan atyndaǵy ortalyq stadıonnyń batys búıirindegi gúlzarbaqqa jaıǵasty.

Tarıhı músinniń ashylý saltanatyna jergilikti bılik ókilderi men shahar turǵyndary jáne Aqtóbeden batyrdyń urpaqtary arnaıy keldi, dep habarlaıdy otyrar.kz.

Tarıhı keshenniń avtory - músinshi Ábdikárim Ahmetov. Eskertkishtiń bıiktigi-10 metr. Tuǵyrdyń ústinde atqa qonǵan Tileý Aıtuly men onyń uly Joldyaıaq batyrdyń músinderi - 5 metr.

Tileý Aıtuly - Alty alashqa áıgili, bı ári batyr qolbasshy. Noǵaı ulysynyń bıleýshisi Musanyń urpaǵy. 1681-1684 jyldary jońǵarlarǵa qarsy shapqan, Saıram soǵysynda 17 myń qol jınap, qasyna uly Joldyaıaq pen inisi Qaldybaı batyrlardy ertip, sol dalada erlikpen qaza tapqan.

Osynaý qazaqtyń en dalasy úshin jaýdy jyǵyp, táýelsizdik tańyn jaqyndatqan Joldyaıaq pen Tileý batyrlardyń eskertkishiniń avtory, músinshi Ábdikárim Ahmetovtyń aıtýynsha, tarıhı týyndyny jasaý úshin 2 aı ýaqytyn sarp etken.