Shymkentte Qazaqstan-Túrkııa ınvestıtsııalyq forýmy ótip jatyr
ShYMKENT. QazAqparat - Búgin Shymkentte alǵash ret birlesken Qazaqstan-Túrkııa ınvestıtsııalyq forýmy bastaldy. Óńirge sheteldik ınvestıtsııalardy kóptep tartýǵa baǵyttalǵan úsh kúndik sharaǵa 200-ge jýyq túrkııalyq delegat pen qazaqstandyq 300 kásipker qatysýda, dep habarlaıdy «QazAqparat» HAA tilshisi.
Forýmǵa túrik elinen kelgen delegattar quramyn Túrik Keńesi Bas hatshysynyń orynbasary Omer Kodjaman men Túrkııa Respýblıkasy Ulttyq ekonomıka mınıstriniń keńesshisi Taryk Sonmezder bastap keldi. Sonymen qatar Ankara qalasy meriniń keńesshileri Ramazan Kabasakal, Mehmed Alı Arslan jáne Sakarııa provıntsııasynyń saýda-ónerkásip palatasynyń basqarma tóraǵasy Mahmýd Kosemýsýl jáne densaýlyq saqtaý, ekonomıka mınıstrliginiń ókilderi men kásipkerler syndy jaýapty tulǵalar da alqaly jıynǵa qatysty. Al, Qazaqstan tarapynan forým jumysyna QR Investıtsııalar jáne damý mınıstrligi Investıtsııalar komıtetiniń tóraǵasy Saparbek Tuıaqbaev pen oblys ákimi Janseıit Túımebaev jáne osy salaǵa qatysty jaýapty jetekshiler men kásipkerler boldy.
Alqaly jıynda túrkııalyq ınvestorlarǵa óńir ekonomıkasy men ınvestıtsııalyq ahýaly jáne ınvestıtsııalarǵa qatysty QR-nyń memlekettik baǵdarlamalary tanystyryldy. Sondaı-aq, munda eki jaqty iskerlik toptar arasyndaǵy saýda-ekonomıkalyq qarym-qatynastardy jandandyryp, nyǵaıtatyn iskerlik baǵdarlama retinde V2V kezdesýlerge basymdyq beriletin bolady.
Ońtústik óńirine arnaıy kelgen túrik kásipkerlerine alǵysyn bildirgen óńir basshysy J.Túımebaev bul forýmnyń Elbasynyń keshegi «Qazaqstannyń úshinshi jańǵyrýy: jahandyq básekege qabilettilik» atty Joldaýynda aıtylǵan mindetterdi oryndaýdaǵy negizgi alǵysharttardyń biri ekenin atap ótip, jıynnyń mańyzdylyǵyna toqtaldy. Sonymen qatar, Túrkııa Qazaqstannyń saıası jáne ekonomıkalyq turǵydaǵy eń jaqyn jáne senimdi seriktesine aınalǵanyn aıtyp, búgingi eki jaqty kezdesýdiń jemisti bolaryna senim bildirdi.
Aıta keteıik, úsh kún boıy ótetin qazaq-túrik ınvestıtsııalyq forýmy aıasynda «OQO-nyń ınvestıtsııalyq áleýeti» taqyrybyndaǵy konferentsııadan bólek, Ońtústik Qazaqstan oblysynyń ınvestıtsııalyq jobalarynyń, taýar óndirýshileriniń, damý ınstıtýttarynyń jáne týrıstik jobalarynyń kórmesi, sonymen qatar, OQO-nyń negizgi týrıstik baǵyttary boıynsha aqparattyq týrlar ótkizý josparlanýda.
