Shymkentte qaýipti indetke shaldyqqan 16 adam - tótenshe jaǵdaı qyzmetkerleri
«Ókinishke qaraı, barlyq qabyldanǵan sharalarǵa qaramastan, KVI dıagnozy rastalǵan shymkenttikterdiń sany artyp keledi. 21 sáýir saǵat 12:30-daǵy jaǵdaı boıynsha qalamyzda atalǵan indetti juqtyrǵandar sany 103 adamǵa jetti. Belgili bolǵany, keshe anyqtalǵan 23 naýqastyń 16-sy - tótenshe jaǵdaı qyzmetiniń ókili. Naýqastarmen baılanysta bolǵan adamdardyń barlyǵy anyqtalyp, karantınge jatqyzyldy. Bul degenimiz - vırýsty ınfektsııany juqtyrý qaýpi joǵary topqa dárigerler, polıtseıler men áskerı qyzmetkerlerden bólek qutqarýshylar da enip otyrǵanyn kórsetedi. Soǵan qaramastan qalanyń barlyq órt sóndirý bólimderi, sonyń ishinde 101 jáne 112 qyzmetindegiler shtattyq rejımde jumys isteýde» delingen habarlamada.
Qala ákimi sondaı-aq, turǵyndardy asa qajettilik bolmasa úılerinen orynsyz shyqpaýǵa shaqyrǵan.
«Sebebi, vırýstyń tasymaldaýshysy nemese indetti juqtyrǵan naýqaspen baılanysta bolǵan adammen betpe-bet kezdesip nemese kezdespegenińizdi búgin boljaý múmkin emes. Óz týystaryńyz ben jaqyndaryńyzdyń densaýlyǵy úshin ózin-ózi oqshaýlaýdyń qatań rejımin saqtańyz. Ózińizge qymbat jandardyń ómirin qaýipke tikpeńiz» delingen ákimniń paraqshasynda.