Shymkentte qatty jelden aǵash gaz qubyryna qulap, turǵyndar kógildir otynsyz qaldy
ShYMKENT. QazAqparat - Shymkentte qatty jelden aǵash gaz qubyryna qulap, turǵyndar kógildir otynsyz qaldy. Gaz berýshi mekemeniń málimetinshe, tótenshe jaǵdaı saldarynan 142 úı qubyrdan ajyratylǵan, dep habarlaıdy QazAqparat tilshisi.
Keleńsiz jaǵdaı túngi on ekiler shamasynda bolǵan. Sasbuqaev kóshesindegi aǵashtardyń biri qatty jelge shydas bermegen. Qulaǵan aǵash turǵyn úılerge tartylǵan 25 mm qubyrdy buzyp, negizgi 32 mm qubyrdan ajyratyp jibergen. Oqıǵa ornyna jetken mamandar dereý qubyrdan gaz taraýdyń aldyn aldy. Endi jóndeý jumystaryn «Intergaz Ortalyq Azııa» AQ-nyń 3 qyzmetkeri júrgizýde.
