Shymkentte qatty qaldyqtardy shyǵarý tarıfi 2 ese ósedi
Buǵan deıin jer úıde turatyn ár adam aıyna 200 teńgeden tólese, sáýir aıynan bastap ol kórsetkish 418 teńgege kóteriledi.
Qalalyq jaıly ortany damytý basqarmasynyń málimetinshe, úshinshi megapolıste sońǵy ret qoqys shyǵarý baǵasy 2017 jyly bekitilgen. Al, janarmaı men tehnıkanyń baǵasy eki ese ósken. Ári 2017 jyly aılyq eseptik kórsetkish kólemi de áldeqaıda az bolǵan. Sondyqtan tarıf qunyn ósirýge týra keledi.
Endi sáýir aıynan bastap qoqys shyǵarý úshin kópqabatty turǵyn úıdegiler jan basyna – 378 teńge, jer úıdegiler 418 teńgeden tóleıdi. Al zańdy tulǵalar úshin tekshe metrine – 2389 teńge. Munyń ózi ózge oblystarmen salystyrǵanda birshama tómen.
«Almaty qalasynda 2019 jyly bekitilgen tarıf, kópqabatty turǵyn úıler 1 adamǵa – 390 teńge, jer úıler úshin – 414 teńge, 1 tekshe metrine 2144 bolyp bekitilgen. Salystyrmaly túrde basqa oblystardan bizdiń tarıf tómen», - dedi Shymkent qalasy jaıly ortany damytý basqarmasynyń basshysy Erjan Joldasov.
Aıta keteıik, úshinshi megapolıste qatty qaldyqtardy shyǵarý boıynsha halyq tarapynan shaǵym kóp. Kóbinese turǵyndar úıilip jatqan qoqystarǵa narazylyǵyn bildirip jatady. Ótken jyly ekologtar aryz-shaǵymdar negizinde jospardan tys tekserý júrgizip, zań buzýshylyqtardy anyqtady. Nátıjesinde, birqatar kompanııalarǵa aıyppul salyndy.
