Shymkentte qatty dári-dármekter shyǵaratyn kásiporyn jumys isteı bastady
ShYMKENT. QazAqparat - Shymkenttegi «Hımfarm» zaýytynda peroraldy qabyldaýǵa arnalǵan qatty dári-dármekter shyǵaratyn jańa tseh iske qosyldy. Jylyna 200 mıllıon tabletka shyǵarýǵa qaýqarly kásiporynnyń ónimi kepildendirilgen tegin medıtsınalyq kómek aıasynda satyp alynatyn bolady, dep habarlaıdy QazAqparat HAA tilshisi.
Búgin zaýyttyń 135 jyldyǵy men tsehtyń iske qosylýy saltanatty túrde atalyp ótti. Sharaǵa qatysqan oblys basshysy Janseıit Túımebaev zaýyt basshylary men qyzmetkerlerin búgingi qos qýanyshpen quttyqtady.
«1882 jyly qurylǵan «Hımfarm» AQ respýblıkamyzdaǵy eski farmatsevtıkalyq kásiporyndardyń biri. Búgin atalǵan kásiporynǵa 135 jyl tolyp otyr. 2011 jyldyń tamyz aıynan kásiporynnyń seriktesi eýropalyq «Polpharmagroup» kompanııasy bolyp keledi. Kásiporynnyń órkendep damýyna tilektestigimdi bildire otyryp, el ekonomıkasynyń damýyna qosar úlesterińiz kóp bolsyn deımin», - dedi ákim.
Jańa tseh farmatsevtıkalyq ónimderge qoıylatyn GMP talaptaryna saı salynǵan. Qatty dári shyǵaratyn óndiris tsehy zamanaýı qurylǵylarmen jabdyqtalǵan. Munda 72 adam jumyspen qamtylsa, olardyń basym bóligi Polpharma tobynyń úzdik óndiris oryndarynda oqyp kelgen. Óndiristiń quny 13,5 mln AQSh dollaryn quraıdy. 
Sondaı-aq, QR Úkimeti men Ońtústik Qazaqstan oblysy ákimdiginiń qoldaýymen dári shyǵarýshy kompanııasyna ónimderin satyp alý kepildigi berilip otyr.
«Búgin biz peroraldy qabyldaýǵa arnalǵan qatty dárilerdiń jańa óndirisin iske qostyq. Bul 2011 jyldan beri ashylǵan, halyqaralyq GMP sapa standartyna saı keletin úshinshi tseh. Bizdiń dári-dármek Qazaqstan men kórshi elderdegi ambýlatorııalar men statsıonar emdeý mekemelerinde tıimdi qoldanylýda. Dári shyǵarýshy kompanııanyń turaqty jáne údemeli damýynyń taǵy bir jobasyn sátti aıaqtaǵanymyzdy maqtan tutamyz», - dedi kompanııanyń bas dırektory Ijı Ýrbanets.
Zaýyttyń óndiris qorjynynda terapııanyń túrli salalaryndaǵy aýrýlardy emdeýge arnalǵan 12 farmatsevtıkalyq topqa jatatyn 200-den astam dári-dármek bar. Kompanııa óz ónimderiniń 90% ishki naryqqa jetkizse, 10%-yn bes elge eksporttaıdy, olar - Reseı, Qyrǵyzstan, Tájikstan, Monǵolııa jáne Túrikmenstan. Bolashaqta Ózbekstan Respýblıkasymen de tyǵyz baılanys ornatpaq.
Dári shyǵarýshy kompanııa farmatsevtıkalyq ónimderdiń jańa túrlerin jańǵyrtý jáne óndirý maqsatynda «Hımfarm» AQ-ǵa 100 mln. AQSh dollarynan astam ınvestıtsııa quıdy. Qazirgi ýaqytta kompanııa dári-dármekter óndirýshilerdiń arasynda jetekshi oryn alady jáne otandyq dári-dármekter naryǵynyń 40 paıyzyn, al elimizdegi jalpy dári-dármekter naryǵynyń 4 paıyzyn qamtıdy.
Aıta keteıik, 2016 jyly Polsha Respýblıkasy men OQO arasyndaǵy taýar aınalym 13,3 mln AQSh dollaryn qurasa, jyl basynan beri taýar aınalymy 8,5 mln AQSh dollaryn qurady.
