Shymkentte Kaspi Bank-ten aqsha urlaǵan kúdikti Almatydaǵy bólimsheni de tonamaq bolǵan
Bul aqparatty Kaspıı banktiń baspasóz qyzmeti rastady.
«Polıtsııa bıyl 13 qazanda Shymkenttegi bank bólimshesi tonaǵan kúdiktiniń ótken jyly 2 qyrkúıekte Almatydaǵy bólimshesin tonamaq bolǵandyǵyn anyqtady. Ustalǵan adam kinásin moıyndady. Polıtsııa onyń basqa da qaraqshylyq shabýyldarǵa qatysy bar-joǵyn tekserýde.
QR Qylmystyq kodeksiniń 192-shi «Qaraqshylyq» babynyń 4-tarmaǵy boıynsha kúdiktiniń múlki tárkilenip, 15 jylǵa deıin bas bostandyǵynan aıyrylýy múmkin.
Qýanyshqa oraı, tonaý kezinde bank klıentteri men qyzmetkerleri zardap shekken joq», - dedi baspasóz qyzmetinen.
Banktiń habarlaýynsha, urlanǵan qarajattyń biraz bóligi qaıtaryldy, qalǵanyn qaıtarý boıynsha jumys júrgizilýde.
QR ІІM Memlekettik til jáne aqparat departamentiniń dırektory Almas Sadýbaev málimdeýinshe, Shymkent qalasyndaǵy Kaspıı bank bólimshesine kúdiktiniń qaraqshylyq shabýyl jasaǵan sáti kameraǵa túsip qalǵan.
«Qylmys barysy baqylaý kamerasynyń nysanasyna ilikken. Tonaýshy bank ǵımaratynyń negizgi kire beris esiginen erkin kirgen. Betin mata betperdemen tumshalap alǵan ol «jarylǵysh paketke» uqsas zatty edenge laqtyryp, atalǵan zat tútindeı bastaǵan kezde bank qyzmetkerlerin baltamen qorqytyp, ulttyq jáne sheteldik valıýtadaǵy kólemdi qarajatty alǵan. Osydan keıin ol qylmys ornynan boı tasalaǵan», - dedi ol.
Departament basshysynyń aıtýynsha, kúdiktiniń turǵylyqty meken jaıynan urlanǵan aqshanyń biraz bóligi tabylǵan. «Kúdiktiniń turǵylyqty meken jaıynan urlanǵan aqshanyń biraz bóligi, sómke, qolǵap jáne jasalǵan qylmysqa onyń qatysy bar ekendigin dáleldeıtin ózge de zattaı aıǵaqtar tabylyp, tárkilendi. Osy iske qatysty tergeý jalǵasýda», - dedi Almas Sadýbaev.
Aıta ketý kerek, byltyr qyrkúıekte Almatyda belgisiz bireý Tóle bı men Áýezov kósheleriniń qıylysyndaǵy Kaspıı bank bólimshesin tonamaq bolǵan edi.
Qaraqshylyq shabýyldan bank qyzmetkerleriniń biri japa shekken bolatyn.
