Shymkentte kásipqoı boks matchy ótedi
ALMATY. 5 naýryz. QazAqparat - Shymkent qalasynda 9 naýryzda kásipqoı bokstan reıtıngtik jekpe-jekter ótedi.
Boxrec.com - ınternet caıtynda jarııalanǵan málimetke qaraǵanda, onda 5 jup óner kórsetpek. Aýyr salmaqta ózbekstandyq Elıor Gýlomov qyrǵyzstandyq Ómirbek Ryskeldıevpen kezdesedi. Sýper-orta salmaqta qazaqstandyq Mıhaıl Krınytsın óz otandasy Babyr Artyqbaevpen, al jeńil salmaqta Ánýar Musaǵulov Arman Utjanovpen judyryq túıistiredi. Al Jandos Jetipsbaev pen Qoshbol Júsipovtiń qarsylastary ázirge belgisiz bolyp otyr.
Ándijandyq E. Gýlomov buǵan deıin 4 kezdesý ótkizip, onyń bárin nokaýtpen aıaqtady. Onyń bul jolǵy qarsylasy 22 jastaǵy Ó. Ryskeldıev 4 kezdesýdi jeńip, 5 kezdesýde jeńilis tapqan edi. Al 1988 jyly 20 qyrkúıekte Qaraǵandyda ómirge kelgen M. Krınytsın buǵan 13 jekpe-jek ótkizipti. «Al-Hattab» degen laqap aty bar Mıhaıl 9 kezdesýde utyp, 2 kezdesýde teń túsip, 2 kezdesýde jeńilistiń aşy dámin tatqan. Endi 1 ret jeńistiń dámin tatyp, 3 ret qarsylasynyń basymdyǵyn moıyndaǵan shymkenttik B. Artyqbaevtyń kúshin synaıdy. 24 jastaǵy kókshetaýlyq Á.Musaǵulov buǵan deıingi 3 kezdesýdi de óz paıdasyna sheshken boksshy. Ol endi 1 ret jeńip, 3 ret jeńilis tapqan 22 jastaǵy shymkenttik A. Utjanovtyń sheberligin baıqamaq. 25 jastaǵy shymkenttik J. Jetpisbaev bolsa buǵan deıin 3 ret jeńiske jetse, 2 ret jeńilis tapqan. Sondaı-aq alǵashqy kezdesýde qarsylasyn nokaýtpen utqan Q. Júsipov endi ekinshi jekpe-jegin ótkizgeli otyr.
