Shymkentte kásipkerlikpen aınalysamyn deýshilerge 6 paıyzben nesıe berilýde
ShYMKENT. QazAqparat - Shymkentte nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyn iske asyrý jóninde túsindirý jáne ony júzege asyrý jóninde keńes ótti. Jergilikti kásipkerlerdiń basyn qosqan jıynǵa «Atameken» Kásipkerler palatasynyń basshylyǵy men ekinshi deńgeıli bankterdiń ókilderi, sondaı-aq «Yrys» mıkroqarjylyq uıymy jáne «Damý» qorynyń menedjerleri qatysty, dep habarlaıdy QazAqparat tilshisi.
Shaǵyn jáne orta bıznesti qoldaýda mańyzdy sanalatyn baǵdarlama elimizde osy jyldyń 1 qańtarynan bastap júzege asyrylýda. Qarapaıym adamdardyń tómen paıyzben jeńildetilgen nesıege qol jetkizýin arttyrýdy kózdeıtin baǵdarlama jıynda jan-jaqty túsindirildi. Baǵdarlamanyń jańalyǵy sol, nesıeler bar bolǵany alty paıyzben beriledi, ári barlyq salaǵa qarjy qarastyrylǵan. Mamandardyń sózinshe, nesıeni kez kelgen azamat - bıznesin bastaǵandar da, endi josparlaǵandar da, qala berdi jumyssyz júrgender de ala alady. Al, nesıeni alý úshin turǵyndarǵa óńirdegi ekinshi deńgeıli 6 bankke baryp, qujat rásimdeýi qajet. Kepildemege qoıatyn múlki bolmasa, «Damý» qory 85 paıyzǵa deıin kepildeme bere alady. Bul maqsatqa búginde oblysqa ekinshi baǵyty boıynsha 2 mlrd 476 mln 400 myń teńge aýdarymdar bólingen. Olardyń bári ekinshi deńgeıli bankterge túsken. Qazirdiń ózinde osy qarajattar esebinen 8 jobaǵa 97 mln teńge berilip otyr. Taǵy 500 mln teńgeniń jobalaryna qarjy berý týraly sheshim qabyldanǵan. Al, nesıeniń maksımaldy somasy - 8000 AEK nemese shamamen 18 mıllıon teńgeni quraıdy. Kezdesýde ekinshi deńgeıdegi bankter men «Damý» qorynyń ókilderi kredıtteýdiń sharttary men tártibi týraly tolyq aqparat berdi jáne kepildik alý shemasyn kórsetti. Kásipkerler qyzyǵýshylyq týdyratyn suraqtarǵa jaýap aldy.
«Biz jyldyń sońyna deıin osy qarjylardyń bólinýi boıynsha saraptama júrgizemiz. Árbir bankke qarajat bólindi me, jyldyń sońyna deıin qansha jobalar qarjylandyryldy, basqa bankter nege qarjylandyra almaı jatyr. Solardyń problemasyn qarap, keıin usynysty Astanaǵa, osy baǵdarlamany júrgizip jatqan mınıstrlikke jiberemiz», - deıdi OQO «Atameken» Ulttyq kásipkerler palatasynyń dırektory Asqar Ábýbákirov.
