Shymkentte kásipkerlikke zańsyz aralasqan 13 laýazymdy tulǵa qylmystyq jaýapkershilikke tartyldy

ShYMKENT. QazAqparat -Shymkent qalasynda Sybaılas jemqorlyqqa qarsy is-qımyl agenttiginiń óńirlik departamentiniń uıymdastyrýymen «Bıznesti qorǵaý - ózara is-qımyl, damý, problemalar jáne olardy sheshý joldary» taqyrybynda dóńgelek ústel ótti, dep habarlaıdy QazAqparat tilshisi.

Sharaǵa Departament basshylyǵy men Kásipkerler palatasynyń ókilderi, Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń tóraǵasy M.Seıtjanov pen kásipkerlik jáne ındýstrıaldy-ınnovatsııalyq damý basqarmasynyń basshysy B.Dúısebekov qatysty.

Jıynda bıznesti qorǵaý men oǵan qolaıly ınvestıtsııalyq jaǵdaı jasaý, atalǵan saladaǵy problemalar men olardy sheshý joldary qarastyryldy. Bıznes ortada sybaılas jemqorlyqqa qarsy minez-qulyq úlgisin qalyptastyrý máseleleri sóz boldy. Jergilikti kásipkerler qatysqan jıynda Departament basshysy Ashat Jumaǵalı bızneske qolaıly jaǵdaı jasaý jáne onyń damýy memlekettik saıasattyń negizgi baǵyttarynyń biri bolyp tabylatyndyǵyn atap ótti. Departament basshysynyń aıtýynsha, kásipkerlikti keshendi qorǵaýdy qamtamasyz etý maqsatynda Agenttikpen «Protecting Business and Investments, ıaǵnı bıznes pen ınvestorlardy qorǵaý» jobasy iske asyrylýda.

«Atalǵan joba Departament tarapynan da júzege asyrylýda. Búgingi tańda jalpy somasy 78 mlrd teńgege jýyq 45 jobaǵa qoldaý kórsetilýde», - dedi Ashat Jumaǵalı.

Jalpy alǵanda, ótken jyly bıznesti qorǵaý sharalary aıasynda departamentpen 30-dan asa kásipkerlik sýbektisiniń quqyqtary qalpyna keltirilip, olardyń qyzmetine zańsyz aralasqany úshin 13 laýazymdy tulǵa qylmystyq jaýapkershilikke tartylǵan.

Bıznesti qorǵaý máseleleri erkin formatta talqylanǵan jıynda quqyq buzýshylyqtardyń aldyn alý jáne uıymnyń iskerlik bedelin qorǵaý maqsatynda kvazımemlekettik jáne jeke sektor uıymdarynda korporatıvtik adaldyq standarttaryn saqtaýǵa jaýapty jemqorlyqqa qarsy komplaens-qyzmetter ınstıtýtyn qurý jaıy qamtyldy. ISO 37001 sybaılas jemqorlyqqa qarsy standartyn engizý joldary qarastyryldy. Sondaı-aq, kásipkerliktiń damýyna kedergi keltiretin ózekti problemalyq máseleler talqylanyp, bıznes ókilderiniń usynys-pikirleri tyńdaldy.

Jıyn sońynda «Nur-kz», «Býmprom», «Ekofarm Interneıshnl», «Green Cross Eco» JShS-men sybaılas jemqorlyqqa qarsy súıemeldeý boıynsha kelisimshartqa qol qoıyldy.