Shymkentte kásipkerlerdiń máseleleri basty nazarda
Bul týraly «Ońtústik» arnaıy ekonomıkalyq aımaǵynda ótken baspasóz týry barysynda aıtyldy, dep habarlaıdy QazAqparat tilshisi.
QR Sybaılas jemqorlyqqa qarsy is-qımyl agenttiginiń Shymkent qalasy boıynsha departamenti uıymdastyrǵan joba aıasynda ózara yntymaqtastyq týraly kelisimge qol qoıǵan «Tumar Textile» JShS-nyń jumysy tanystyryldy.
Kompanııa ókili M.Álimbekovtyń aıtýynsha, olar quzyrly organdar tarapynan ótinishti qaraý barysynda ákimshilik kedergilerge tap bolǵan. Alaıda Shymkent qalasy boıynsha sybaılas jemqorlyqqa qarsy qyzmet ókilderiniń aralasýymen ótinish zańǵa sáıkes oń sheshimin tapqan. Kásipker atalmysh joba elimizge ınvestorlardyń kóptep kelýine úlken septigin tıgizedi jáne bıznestiń damýyna tikeleı úles qosatyn jaqsy bastama ekenin aıtady. Qazirgi tańda atalǵan departament tarapynan jalpy somasy 53 mlrd teńgeden asatyn 20 ınvestıtsııalyq kelisimge qol qoıylǵan.
«Investorlar úshin jańa bıznes ıdeıalaryn iske asyrýǵa kedergi jasaıtyn máseleler áli de joq emes. Osyǵan baılanysty agenttikpen birlesip atqarylatyn joba jumystary qarqyndy damýda. Kompanııany súıemeldeý úshin adal bıznes júrgizýge mindetteletin kelisimge qol qoıý jetkilikti. Sondaı-aq, biz qoljetimdi jáne ashyq ekendigimizdi taǵy da atap ótkim keledi», - deıdi departament basshysynyń birinshi orynbasary Talǵar Ábdinábıuly.
Aıta keteıik, bıznesti qorǵaý, qolaıly ınvestıtsııalyq jaǵdaı jasaý jáne kásipkerler úshin sybaılas jemqorlyq derekteri boıynsha qysymdardy tómendetý – Agenttik jumysynyń basym baǵyttarynyń biri sanalady. «Protecting business and investment» jobasy nátıjesinde kásipkerlerge qolaıly ınvestıtsııalyq ahýal qalyptastyrylyp, memlekettik bılik ınstıtýttaryna bıznes pen ınvestorlardyń senimi nyǵaıyp keledi.