Shymkentte kásipkerlerdiń quqyǵyn buzǵan qyzmetkerler jaýapkershilikke tartyldy
Shymkenttik bıznes ókilderi jer qatynastary, salyqtyq jáne kásipkerlik bastamalardy memlekettik qoldaý salalaryndaǵy kedergilerge jıi shaǵymdanǵan. Jyl basynan beri departamenttiń usynysy boıynsha kásipkerlerdiń quqyǵyn buzǵany úshin memlekettik organdardyń 6 qyzmetkeri tártiptik jaýapkershilikke tartylǵan.
Departament qyzmetkerleri «Bızneske jol» jobasy aıasynda 700-den astam kásipkerdiń quqyǵyn qorǵap, 2 600-den astam bıznes ókilimen 55 kezdesý ótkizgen.
«Shymkent qalasynyń Sybaılas jemqorlyqqa qarsy qyzmetine kásipker negizsiz 7 aı boıy jer ýchaskesin jalǵa berýdi uzartýdan bas tartqan memlekettik organǵa shaǵymdandy.
Departament múddeli taraptarmen kezdesý ótkizip, usynymdar engizildi. Qorytyndysy boıynsha ákimdik jaldaý merzimin 10 jylǵa uzartty» - dedi departament basshysynyń birinshi orynbasary Jandos Jumabaev brıfıngte.
Brıfıngte qalalyq kásipkerler palatasynyń dırektory Sabıra Adambekova ótken jyly kásipkerler palatasynyń qaraýyna 200-ge jýyq ótinish kelip túskenin jetkizdi. Onyń ishinde 63,8 paıyzy oń sheshimin tapqan.
