Shymkentte kásipkerlerdi bopsalaýmen aınalysqan qylmystyq top ustaldy
Shymkent qalasy Polıtsııa departamentine jeke kásipker beıtanys eki azamattyń bopsalaǵany týraly aryzben júgindi. Ony kúshpen qorqytqan er adamdar jábirlenýshige tıesili Toyota Camry 70 avtokóligin tartyp alǵan. Atalǵan jaıt QR Qylmystyq kodeksiniń 194-baby (Qorqytyp alý) boıynsha tirkelip, qylmystyq is qozǵaldy. Asa aýyr qylmysty ashý maqsatynda Shymkent qalalyq Uıymdasqan qylmysqa qarsy kúres basqarmasynyń qyzmetkerleri barlyq qajetti jedel-izdestirý sharalaryn júrgizdi. Nátıjesinde birneshe kúnniń ishinde tergeýshiler bopsalaý jaıtyna qatysy bar kúdiktilerdiń kim ekenin anyqtady.
«Ekeýi de jergilikti qala turǵyndary, bireýi buryn birneshe ret sottalǵan. UQQ qyzmetkerleri kúdiktilerdiń birin turǵylyqty mekenjaıynda qolǵa túsirdi. Al sybaılasy qaladaǵy qonaqúılerdiń birinde ustaldy. Olardan eki ańshylyq pyshaq, 160 oǵy bar pnevmatıkalyq tapansha, 21 oǵymen AK-47 avtomaty jáne Makarov tapanshasynyń qaby tárkilendi»,-delingen habarlamada.
Qazirgi tańda kúdiktiler qamaýda. Olarǵa qatysty sotqa deıingi tergep-tekserý amaldary júrgizilýde. Sondaı-aq polıtsııa ustalǵandardyń qazan aıynyń basynda taǵy bir azamattyń Iphone 13 Pro Max uıaly telofonyn alyp qoıyp, qaıtarmaı qoıǵanyn anyqtady. Bul týraly aryz Eńbekshi APB-da tirkelgen. Jedel ýákilder qylmystyq toptyń osyǵan uqsas basqa da qylmystarǵa qatysy bar-joqtyǵyn tekserýde.
Foto: polisia.kz