Shymkentte kásipkerler koronavırýspen kúres úshin qorǵa 100 mln teńgeden astam qarjy bóldi

ShYMKENT. QazAqparat – Shymkent qalasynyń kásipkerleri koronavırýspen kúreske úlesin qosyp, «Shymkent – qaıyrymdy qala» áleýmettik-qaıyrymdyq qoryna 100 mln teńgeden astam qarjy bólgen. Bul týraly qor dırektory Dáýrenbek Qurbanııazov málimdedi, dep habarlaıdy QazAqparat tilshisi.

Dáýrenbek Qurbanııazovtyń aıtýynsha, bul qarjyǵa 5 dana ókpeni jasandy jeldetý apparaty alynǵan. Quraldardyń tórteýi jańa juqpaly aýrýhanaǵa, bireýi kardıologııalyq ortalyqqa ornatylǵan. Búginde osy maqsatqa jumsalǵan qarjy kólemi 90 mln teńgeni quraıdy.

Sonymen qatar, qyzmettik boryshyn óteý barysynda qaza bolǵan dárigerlerdiń otbasyna da «Shymkent qaıyrymdy qala» qory tarapynan qarjylaı qoldaý kórsetildi. Kúni búginge deıin qordyń kómegimen qosymsha ashylǵan provızorlyq ortalyqtardaǵy tósek-orynǵa arnalǵan 30 kereýet pen 2 400 lıtr mıneraldy sý alynǵan. Aldaǵy aptada 10 myń betperde men 1 myń dana medıtsınalyq kıim taratý josparlanyp otyr.

Aıta ketsek, «Shymkent – qaıyrymdy qala» qorynyń negizgi maqsaty – áleýmettik, mádenı, ǵylymı, sporttyq, bilim berý maqsattaryna qol jetkizý, azamattardyń densaýlyǵyn saqtaý, qorshaǵan ortany qorǵaý, sonymen qatar basqa da áleýmettik paıdaly máseleler. Bul qor koronavırýs ınfektsııasymen kúreste úlken áleýmettik kómek kórsetip keledi