Shymkentte qarjy basqarmasynyń burynǵy basshysy sottaldy
Qarataý aýdandyq sotynyń sýdıasy Alpysbaı Nálibaev aıyptalýshyny Qylmystyq Kodekstiń 361-babymen («Laýazymdyq ókilettikterdi teris paıdalaný») kináli dep tanydy. Ómir boıyna memlekettik qyzmette isteýge tyıym saldy. Aıyptalýshy sot zalynan qamaýǵa alyndy. Alaıda, onyń qorǵaýshysy bul úkimmen kelispeıtinin aıtyp, apellıatsııalyq shaǵym túsiremiz dep otyr. Aıtýynsha, sotta qaralǵan iste qylmys quramy joq.
«Sot Janbosynovty «qyzmettik ókilettiligin keraǵar paıdalandy» dep tapty. Ol úshin Janbosynovtyń is-áreketinen memleketke, ne qoǵamǵa asa aýyr materıaldyq zalal kelýi kerek. Tergeý organdary zalal keltirdi degenmen, jábirlenýshi tarap zalal keltirmedi deıdi. Tergeýde de, sotta da zalaldy anyqtaıtyn dáleldemeler bolmady», - deıdi qorǵaýshy.
Kenjebek Janbosynov 2018 jyly basqarma basshysy jáne qala ákimdigi janyndaǵy «Shymkent» áleýmettik-kásipkerlik korporatsııasy» AQ dırektorlar keńesi múshesi qyzmetine kelgen. Sot ony osy qyzmette júrgeninde jastarǵa arnap salynǵan 518 páterdi naryqtyq qunyn bile tura turǵyn úı basqarmasynyń tómen baǵada satýyna jol bergen dep tapty. Sondaı-aq, aktsıonerlik qoǵamǵa asa iri mólsherde zııan keltirdi degen aıyp taqty. Al, keltirilgen zııan kólemi 1 mlrd 118 mıllıon teńgeden asady. Sot Janbosynovpen birge páterdi arzan baǵada satýǵa qatysy bolǵan «Shymkent» áleýmettik-kásipkerlik korporatsııasy» AQ dırektorlar keńesiniń taǵy eki múshesiniń isin tergeýge jiberdi.
Aıta keteıik, 49 jastaǵy Kenjebek Janbosynovtyń ústinen qylmystyq is 2021 jyly qozǵalǵan bolatyn. Tergeý 8 aıǵa sozyldy.
Buǵan deıin habarlaǵanymyzdaı, Shymkentte ınternet alaıaqtyqqa qatysy bar kúdiktiden 6 telefon men 20 SIM karta tárkilendi.