Shymkentte karantınge jabylǵan kenttegi turmysy tómen otbasylarǵa áleýmettik qoldaý kórsetilýde

ShYMKENT. QazAqparat – Shymkent qalasyndaǵy karantınge jabylǵan «Táýelsizdikke 20 jyl» turǵyn alabynda turatyn áleýmettik jaǵdaıy tómen, az qamtamasyz etilgen jáne kópbalaly otbasylarǵa, múmkindigi shekteýli jandarǵa áleýmettik qoldaý kórsetilýde. Bul týraly Abaı aýdanynyń ákimi Buharbaı Parmanov aqparattyq kommýnıkatsııalar ortalyǵynda ótken brıfıng barysynda málimdedi, dep habarlaıdy QazAqparat tilshisi.

Buharbaı Parmanovtyń aıtýynsha, «Nur Otan» partııasy uıymdastyrǵan «Biz birgemiz!» respýblıkalyq aktsııasynyń aıasynda 107 jaǵdaıy tómen otbasyǵa azyq-túlik sebeti tegin taratylǵan.

«Táýelsizdikke 20 jyl» turǵyn alaby koronovırýs ınfektsııasyna baılanysty 14 kúnge karantınge jabylǵany belgili. Biz osy qıyn kezeńde áleýmettik turǵyda álsiz otbasylarǵa barynsha qoldaý kórsetip jatyrmyz. Elbasy tarsyrmasymen uıymdastyrylǵan «Biz birgemiz!» respýblıkalyq aktsııasynyń aıasynda 716 otbasyǵa 40-50 paıyz jeńildikpen kartop, pııaz, sábiz, maı, un usynyldy»,- dedi aýdan ákimi.

Ol sondaı-aq, kentke arzandatylǵan baǵamen birinshi surypty un jetkizilgenin atap ótti.

Onyń málim etýinshe, qazir nan baǵasy turaqty. Nan eldimekenniń janyndaǵy Jańatalap turǵyn alabynda naýbaıhanada pisirilip, karantınge jabylǵan turǵyndarǵa 75 teńgeden satylyp jatyr. Al, «LTD Turmys» uıymy eldimekenge kúnine 2 mezgil taza aýyz sý jetkizip berýde.

Aýdan ákiminiń aıtýynsha, eldimekendegi barlyq turǵyndar qaýipsizdik talaptaryn saqtaýda. Barlyq 2 856 turǵynǵa turaqty túrde tegin medıtsınalyq betperde taratylýda.

Aıta keteıik, «Táýelsizdikke 20 jyl» turǵyn alabynda 132 az qamtamasyz etilgen, 96 kópbalaly otbasy bar.