Shymkentte karantındik shekteý taǵy da uzartyldy
«Shymkent qalasynyń aýmaǵynda 2020 jylǵy 12 qazan saǵat 00.00-den bastap 2020 jylǵy 26 qazan saǵat 00.00-ge deıin karantındik shekteý sharalary uzartylsyn», - delingen Shymkent qalasynyń bas memlekettik sanıtarııalyq dárigeri Ábdimanap Tólebaevtyń qaýlysynda.
Qaýlyǵa sáıkes demalys jáne mereke kúnderi jabyq azyq-túlik pen azyq-túlik emes bazarlardyń (qabyrǵalary, terezeleri/vıtrajdary bar úı-jaılar, ǵımarattar, qurylystar) qyzmeti toqtatylady. Sondaı-aq demalys jáne mereke kúnderi syıymdylyǵy 30 paıyzdan aspaıtyn jáne bir kelýshige 4 sharshy metrlik keńistik tártibin saqtaýmen azyq-túlik bazarlary men jármeńkelerdiń, azyq-túlik emes bazarlardyń qyzmeti saǵat 06.00-den 18.00-ge deıin shektelgen. Jármeńkelerdiń jumysy kúsheıtilgen sanıtarııalyq-dezınfektsııalyq rejımdi saqtaı otyryp uıymdastyrylyp, onyń ishinde dezınfektsııalyq tonnelderdi jáne sanıtaızerlerdi ornatý mindetti.
«Kınoteatrlardyń (ashyq alańda ornalasqan kınoteatrlardy qospaǵanda), tsırk, saýda-oıyn saýyq keshenderi men ortalyqtardyń, saýda úıleriniń ishindegi balalardyń oıyn alańdarynyń, muz alańdarynyń, batýttar men fýdkorttardyń jumysyna tyıym salynsyn. Ashyq alańdaǵy kınoteatrlardyń jumysy betperde kııý rejımi, áleýmettik qashyqtyq saqtalǵan jaǵdaıda qalypty rejımde ruqsat etilsin», -delingen qaýlyda.