Shymkentte karantınde jatqandar sany 125 adamǵa jetti
Bul týraly sala mamandary óńirlik kommýnıkatsııalar qyzmetinde ótken brıfıngte aıtty, dep habarlaıdy QazAqparat tilshisi.
Qalalyq ákimdiktiń málimetinshe, ózge 56 adam óz úılerinde oqshaýlanǵan. Shaharda barlyq talaptarǵa saı keletin 170 oryn, 680 provızorlyq jatyn oryn ázirlengen. 750 oryndy aýrýhanany dári-dármekpen ustap turýǵa múmkindik bar. 4300 azamat daıyndyq jumystaryna rezerv retinde tur. Sondaı-aq, osy kúnge deıin koronavırýsty anyqtaý úshin 12 adamnan synama alynǵanymen aýrý rastalmaǵan. Olardyń ekeýi Qytaı azamaty. Sonymen qatar, rezervte 650 myńnan asa betperde bar. Qazirgi ýaqytta qaladaǵy memlekettik mekemelerde qyzmetkerler maskamen júrýge mindettelgen. Medıtsınalyq maskiniń baǵasy 25 teńgeden 170 teńgege kóterilgen. Qalada maski tapshy. Kásipkerlermen kelisilip, maski daıyndalyp jatqanymen ol dárihanalarǵa bir aptanyń kóleminde jetkiziledi. Dákeden jasalǵan 1 dana maskiniń baǵasy: 4 oralǵany - 100 teńge, 8 oralǵany - 130 teńge, 16 oralǵany - 200 teńge. Bıliktegiler baǵany túsirýge múmkindik joq ekenin aıtady. Sebebi, dollar baǵamy óskendikten shıkizat qymbat, jumysshylardyń jalaqysy men qaýipsizdigin saqtaý shyǵyny kirgen. Aldaǵy ýaqytta bul maskiler bir adamǵa 5 danadan ǵana satylady. Budan ózge, qaladaǵy 1500 qoǵamdyq kólikti dezınfektsııalaý jumystary kólik ıelerine júktelgen. Antıseptıkterdiń baǵasy 420 teńgeden bolýy kerek. Ár azamatqa 2 nemese 4 danadan ǵana satylýy tıis. Eger osy belgilengen baǵalardan aýytqýshylyq baıqalsa, qala ákimdiginiń saıtyna shaǵymdanýǵa bolady.
«Qazirgi tańda álemdik ekonomıkada biraz qıyndyq týyndaýda. Onyń bizdiń memleketimizge de áseri tııýi múmkin. Soǵan baılanysty Shymkent qalasynda daǵdarysqa qarsy ekonomıkalyq turaqtylyqty qamtamasyz etý jumystary júrgizilýde. Birinshi kezekte halyqty azyq-túlikpen qamtý máselesi tur. Saýda oryndarynda baǵa turaqty, azyq-túlik qory jetkilikti», - dedi Erbol Ábilhaıyruly.