Shymkentte karantın talaptaryna qatysty birqatar ózgerister engizildi
Ǵalymjan Ábishevtiń aıtýynsha, shahardyń Bas memlekettik sanıtarııalyq dárigeriniń №31 qaýlysy shyǵyp, №30 qaýlysyna ózgerister men tolyqtyrýlar engizilgen.
«Atap aıtsaq, saýda ortalyqtarynda, azyq-túlik jáne azyq-túlik emes dúkenderde, qyzmet kórsetý salasyndaǵy obektilerde jáne adamdar kóp jınalatyn oryndarda kúndelikti dezınfektsııalyq is-sharalar ótkizý. Osy qaýlymen qyzmeti toqtatylǵan nysandardy nemese basqa jumys ýaqytysy belgilengen nysandardy qospaǵanda barlyq qyzmet kórsetetin nysandardyń (hımııalyq tazalaý, kir jýý oryndary, kilem tazalaıtyn obektiler, tehnıkany, kıim, aıaq kıim jóndeý sheberhanalary, atele, gúl, ósimdik tyńaıtqyshtaryn, baqsha qural-saımandaryn, qurylys zattaryn jáne quraldaryn, radıotaýarlaryn satatyn dúkender, kıim jáne aıaq-kıim, dúńgirshekter, metall qabyldaıtyn oryndar, maqta tútý tsehtary, uıaly baılanys keńseleri, bıznes-ortalyqtary, advokat, notarıýs, býhgalter jáne konsaltıng kórsetiletin qyzmetteri, jyljymaıtyn múlik jónindegi agenttikter, jarnama agenttikteri, sot oryndaýshylary jáne t.b.) jumys kúnderi (dúısenbi-juma) jumys ýaqyty saǵat 09:00-den 18:00-ge deıin shektelip, demalys kúnderi (senbi, jeksenbi) jumystary toqtatylady. Al avtojýý oryndarynyń jumys ýaqyty saǵat 09:00-den 21:00-ge deıin shektelýmen jumys isteýine ruqsat etildi», – dedi Ǵalymjan Motaıuly.
Aıta keteıik, qalada 24 naýryz ben 12 tamyz aralyǵynda COVID-19 ınfektsııasymen 5131 jaǵdaı tirkelgen. Onyń 2617-si sımptomdy, al 2514-i sımptomsyz. Búginde naýqastardyń 3866-sy saýyǵyp, 1218-i em alýda. Sońǵy málimetterdi jetkizsek, qalada 12 tamyzda ınfektsııanyń 10 jaǵdaıy tirkelip, ósim 0,2% qurap otyr.