Shymkentte karantın kezinde toıhanada 300 adamǵa arnalǵan jıyn uıymdastyrylǵan
Karantın talaptaryna baǵynbaǵandardyń isi Abaı aýdany boıynsha júrgizilgen jedel profılaktıkalyq is-sharalardyń barysynda áshkere bolǵan, dep habarlaıdy QazAqparat tilshisi.
Qalalyq Polıtsııa departamenti baspasóz qyzmetiniń málimetinshe, Jıdeli Baısyn kóshesiniń boıynda ornalasqan «Grand Sultan» toıhanasynyń úsh birdeı zalynda toı-jıyn uıymdastyrylǵany belgili boldy. Quramynda polıtseıler men aýdandyq ákimdik ókilderi bar mobıldi top ókilderi kelgende ǵımarattyń esigi jabyq turǵan. Alaıda bul kezde nysannyń úsh birdeı úlken zalynda dúbirli toı bolyp jatqan mýzykanyń daýysynan anyq anǵarylyp turǵan edi. Quzyrly organ qyzmetkerleri aqyry toıhana esigin ashyp, qonaqtardy tarqatty. Al, karantın talaptaryn óreskel buzǵan toıhana ıesinen túsinikteme alyndy.
«Atalǵan jaıt boıynsha QR ÁQBtK-niń 425 babynyń 1 bóligimen shara qoldaný úshin tıisti organǵa is-qujattar joldandy» delingen habarlamada.