Shymkentte karantın kezinde kompıýter klýby istep turǵan

ShYMKENT. QazAqparat – Shymkentte karantın kezinde jasyryn jumys isteıtin oıyn oryndary azaımaı tur. Osyndaı orynnyń biri Abaı aýdandyq polıtsııa qyzmetkerleri júrgizgen reıd kezinde anyqtaldy, dep habarlaıdy QazAqparat tilshisi.

Qalalyq PD baspasóz qyzmetiniń málimetinshe, Telman bólimshesindegi Sypyrǵan ata kóshesi boıynda ornalasqan «PS na raıone» kompıýter klýby karantın shekteýine qaramastan jumys istep kelgen. Tártip saqshylary oıynhana ákimshisinen túsinikteme alyp, osy jaıt boıynsha QR ÁQBtK-niń 425-baby 1-tarmaqshasy «Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» boıynsha ákimshilik jaýapqa tartý týraly sheshim qabyldaǵan.

«Barlyq jınaqtalǵan is-qujattar Abaı aýdanynyń Taýarlar men kórsetiletin qyzmetterdiń sapasy men qaýipsizdigin baqylaý basqarmasyna protsessýaldy sheshim qabyldaý úshin joldanǵan» delingen habarlamada.