Shymkentte karantın 12 sáýirge deıin sozylady

NUR-SULTAN. QazAqparat – Shymkent qalasynyń bas memlekettik sanıtar dárigeri Ábdimanap Tólebaev COVID-19 jaǵdaıynyń tirkelýiniń jalǵasýyna, vırýsty pnevmonııa aýrýynyń ósýine oraı karantındik is-sharalardy uzartý týraly qaýly qabyldady, dep habarlaıdy QazAqparat tilshisi.

«Shymkent qalasynyń aýmaǵynda 2021 jylǵy 29 naýryz saǵat 00:00-den bastap 2021 jylǵy 12 sáýir saǵat 00:00-ge deıin karantın jáne shekteý is-sharalary uzartylsyn», - delingen qujatta.

Atalǵan qaýlyǵa sáıkes, 29 naýryz ben 12 sáýir aralyǵynda qalada as berý sharalaryn (toltyrylýy 30 paıyzdan artyq emes, biraq 50 adamnan artyq emes) qospaǵanda adamdardyń kóp jınalýyna baılanysty kez kelgen is-sharalardy (týǵan kúnder, mereı toılar, shyǵaryp salý, qudalyq, toı, betashar jáne basqa) ótkizýge tyıym salynady. 65 jastan asqan adamdardyń qalada júrýi shekteledi.

Munan bólek, qoǵamdyq oryndarǵa (onyń ishinde qalalyq qoǵamdyq kólikte sapar shegý kezinde) jáne qyzmetine ruqsat etilgen nysandarǵa barǵan kezde, sondaı-aq, ashyq aýada ornalasqan qoǵamdyq oryndarda bolǵan kezde (5 jasqa deıingi balalardy jáne ashyq aýada sportpen shuǵyldanýdy qospaǵanda) betperde kııý, áleýmettik qashyqtyqty saqtaý jáne antıseptıkterdi paıdalaný jónindegi talaptar qatań saqtalýy qajet.