Shymkentte qaraqshynyń «Kaspıı bankke» shabýyly kameraǵa túsip qalǵan
ASTANA. QazAqparat - Shymkent qalasyndaǵy Kaspıı bank bólimshesine kúdiktiniń qaraqshylyq shabýyl jasaǵan sáti kameraǵa túsip qalǵan. Bul jaıynda QR ІІM Memlekettik til jáne aqparat departamentiniń dırektory Almas Sadýbaev málim etti, dep habarlaıdy QazAqparat.
«Qylmys barysy baqylaý kamerasynyń nysanasyna ilikken. Basqynshy bank ǵımaratynyń negizgi kire beris esiginen erkin kirgen. Betin mata betperdemen tumshalap alǵan ol «jarylǵysh paketke» uqsas zatty edenge laqtyryp, atalǵan zat tútindeı bastaǵan kezde bank qyzmetkerlerin baltamen qorqytyp, ulttyq jáne sheteldik valıýtadaǵy kólemdi qarajatty alǵan. Osydan keıin ol qylmys ornynan boı tasalaǵan», - dedi ol.
Departament basshysynyń aıtýynsha, kúdiktiniń turǵylyqty meken jaıynan urlanǵan aqshanyń biraz bóligi tabylǵan.
«Kúdiktiniń turǵylyqty meken jaıynan urlanǵan aqshanyń biraz bóligi, sómke, qolǵap jáne jasalǵan qylmysqa onyń qatysy bar ekendigin dáleldeıtin ózge de zattaı aıǵaqtar tabylyp, tárkilendi. Osy iske qatysty tergeý jalǵasýda», - dedi Almas Sadýbaev.
