Shymkentte qaraqshynyń izin qýalaǵan polıtsııa qyzmetkerine ózennen júzip ótýge týra keldi

Túngi kezekshilikten oralyp kele jatqan Ál-Farabı polıtsııa bóliminiń tergeý-jedel tobynyń qyzmetkerleri kúdikti jas er adamdy baıqady. Formadaǵy adamdardy kórgen ol jasyrynýǵa árekettendi, dep habarlady vedomstvonyń baspasóz qyzmetinen. Polıtseıler onyń artynan júgirdi. Qyzmetkerlerdiń toqtaý talaptaryna qaramastan jigit toqtamady. Ol Qoshqar ata ózeniniń qasyndaǵy kópirden ótip, jekemenshik sektordyń janyna kúrt burylyp ketti.

Kúdikti jas azamatty ustaý úshin, ál-Farabı PB-niń polıtsııa qyzmetkeri joldy kesip ótýge uıǵardy. Sýyqqa qaramastan, ol sýǵa sekirip, ózennen júzip ótken soń, qýalaýyn jalǵastyrdy. Polıtsııa qyzmetkeri belgisiz er adamnyń terezeniń ishine kirip, ǵımarattardyń biriniń ishine jasyrynǵanyn baıqady. Aǵa leıtenant er adamnan óz erkimen berilýin suraǵan soń, ol jasyrynǵan ornynan shyǵýǵa májbúr boldy. Polıtseılerden qashqan adam avtomobılderden baǵaly zattardy urlaýǵa jáne tonaýǵa kúdikti Shymkenttiń 1997 jylǵy turǵyny bolyp shyqty. Urlanǵan múliktiń bir bóligi odan oqıǵa ornynda alyndy. Kóp uzamaı ony sybaılasy, Shymkent turǵyny - 1996 jylǵy jigit te qolǵa tústi.

Tergeý barysynda sondaı-aq jas azamattardyń turaqqa qoıylǵan kólikterden 5 urlaý faktisine jáne tonaýshylyqqa qatysy bar ekeni belgili boldy. Keltirilgen shyǵynnyń jalpy somasy - jarty mıllıonnan astam teńge. Kúdiktiler qamaýǵa alyndy. Atalǵan faktilermen QR QK-niń 188-baby («Urlyq») jáne QR QK-niń 191-baby («Tonaý») boıynsha sot aldyndaǵy tergeý amaldary júrgizilýde.