Shymkentte qar jaýyp jatqanda asfalt tóseldi
Áleýmettik jelide taraǵan vıdeodan Shymkent kóshelerinde qar jaýyp turǵanda asfalt tóseý jumystarynyń júrip jatqanyn kórýge bolady.
«Bizde Shymkentte qar jaýyp jatyr. Bul Rysqulov pen Dýlatı kóshesiniń qıylysy» - deıdi vıdeo avtory.
Instagram-ǵa ornalastyrylǵan vıdeoǵa oqyrmandar da túrli pikir jazyp jatyr. Olardyń arasynda «Osyny qabyldap alatyn mekemelerdińde sazaıyn berý kerek», «Bul joldyń sapasy qurıdy», «Jazda ne istegen, asfalt tósemeı? Endi ne bolady bul, asfalt? Kóktemde kún jylynǵanda, shashylyp qalady ǵoı. Qaıran, qar bolyp erip ketken, halyqtyń aqshasyn-aı. Suraýy joq qoı» degen kommentarııler bar.
Al, atalǵan máselege jaýap bergen Shymkent qalasynyń jolaýshylar kóligi jáne avtomobıl joldary basqarmasynyń mamandary jol jóndeý jumystary tolyǵymen baqylaýda ekendigin jetkizdi.
«Báıdibek bı dańǵylynda jol jabynyn ortasha jóndeý boıynsha jumystar júrgizilýde. Tegisteý qabatyn tóseý jumystary kúndizgi ýaqytta bastalyp, saǵat 18:00-ge deıin aıaqtaldy. Odan ári asfaltbetondy jol rolıkterimen júrip ótý jumystary júrgizildi»- delingen jazbada.
Sondaı-aq, asfaltbeton qospalarynyń normatıvtik temperatýrasyn saqtaı otyryp júrgizilgendigin aıtqan basqarma mamandary aldaǵy ýaqytta tóselgen asfaltbetonnyń tyǵyzdyǵyna zerthanalyq synaqtar júrgiziletindigin jetkizdi.
Foto: vl.ru