Shymkentte qańtar oqıǵasyna qatysqan áıeldiń úkimi ózgerip, sot zalynda bosatyldy

ShYMKENT. QazAqparat – Memleket basshysynyń Joldaýynan keıin Shymkentte qańtar oqıǵasyna qatysyp, sottalǵan áıeldiń úkimi ózgerdi. Qalalyq sottyń qylmystyq ister jónindegi sot alqasy sottalýshy kelinshektiń isin qaıta qarap, ony sot zalynan bosatty, dep habarlaıdy QazAqparat tilshisi.

Qalalyq sottyń baspasóz qyzmeti málimetinshe, bıyl jazda ál-Farabı aýdandyq sotynda L.Dosmambetovaǵa, Q.Sultanbekke jáne J.Ashtaevqa qatysty sot úkimi shyqqan.

Sot úkimimen barlyq sottalǵandar QK 272-babynyń 2 jáne 3 bóligimen kináli dep tanylǵan.

Ashyq sot otyrysy barysynda sottalǵandardyń qańtar oqıǵasy kezinde Shymkent qalasynyń aýmaǵynda oryn alǵan kúsh qoldaný, qıratý, órteý, buzý, múlikti joıýǵa ulasqan jappaı tártipsizdikke qatysqany jáne azamattardy jappaı tártipsizdikke qatysýǵa shaqyrǵany anyqtalǵan.

Olardyń kinásin sotqa deıingi tergeý organy jınaqtaǵan dáleldemeler rastaǵan.

Sottalǵandardyń buryn sotty bolǵany jáne istiń basqa da mán-jaıy eskerilip, L.Dosmambetovaǵa - 3 jyl 7 aı, J.Ashtaevqa - 3 jyl 1 aı bas, Q.Sultanbekke - 3 jyl 6 aı bas bostandyǵynan aıyrý jazasy taǵaıyndalǵan.

«Qalalyq sottyń qylmystyq ister jónindegi sot alqasy úsh sottalýshynyń isin qaıta qarap, L.Dosmambetovaǵa qatysty úkimdi ózgertti. 12 jasar balasynyń bolýyna baılanysty QK 74-babyna saı úkimniń oryndalýy 2 jylǵa keıinge qaldy. Osy sebepten L.Dosmambetova sot zalynda bosatyldy. Al, qalǵan eki sottalýshynyń úkimi ózgerissiz qaldy» delingen habarlamada.