Shymkentte qańtar qyrǵyny jaıly jańa vıdeoda bankomattyń qalaı urlanǵany túsip qalǵan

ShYMKENT. QazAqparat - Shymkent polıtsııa departamenti qańtar oqıǵasyna qatysty vıdeo jarııalady. Kadrlardan buzaqylardyń ákimdikke basyp kirgenin, polıtsııa qyzmetkerlerine tas laqtyryp, kúsh qoldanyp jatqanyn anyq kórýge bolady, dep habarlaıdy QazAqparat tilshisi.

Vıdeodan beıbit mıtınginiń sońy jappaı buzaqylyqqa ulasqany anyq baıqalady.

Nátıjesinde Shymkent qalasy ákimdiginiń ǵımaraty búlingen. Esikterin syndyryp, kompıýterlerdi urlap ketken.

Al, qujattardy terezeden tómenge laqtyrǵan. Ákimdik qasyndaǵy «Kórme» ortalyǵy órtke orandy.

Beıbitshilik kóshesinde ornalasqan «Nur Otan» partııasy fılıalynyń ǵımaraty da búlindi.

Búlikshiler Nursat shaǵynaýdanynda ornalasqan «Metro» saýda úıiniń esik-terezesin taspen syndyryp, ishindegi bankomatty alyp shyǵyp, júk kólikke salyp urlap ketken.

Sonymen qatar, tártip buzýshylar qala aýmaǵynda kósheler qıylysy men kóshe jelilerinde qaýipsizdikti qadaǵalaý maqsatynda ornatylǵan birneshe «Sergek» jáne basqa da beınebaqylaý kameralaryn syndyryp jatqany beınekameraǵa anyq túsip qalǵan.

Bıik baǵanalarda ornatylǵan beınekameralardy olar arnaıy júk kóliginiń ústine minip, qoldaryndaǵy arnaıy jaraqtarymen uryp qıratqan.

Áskerıler men polıtsııa qyzmetkerlerine kúsh qoldanyp, tas atqylap jatqan sıýjetterde bar. Urýǵa arnalǵan quraldardy kólikten bólip alyp jatqany da anyq kórinedi.

Sondaı-aq, tártip buzýshylar qala ákimdiginiń aldyndaǵy alańda ornatylǵan shyrshany tutatyp, ot qoıǵan.

Alaıda, shyrshanyń belgili bir bóligi ǵana janǵan.