Shymkentte qańǵybas ıtterdi atýǵa tyıym salyndy
ShYMKENT. QazAqparat - Budan bylaı Shymkentte qańǵybas janýarlarǵa oq atylmaıdy. Endi olar mamandandyrylǵan janýarlardy ýaqytsha ustaý pýnktine ornalastyrylatyn bolady, dep habarlaıdy otyrar.kz.
Atalmysh arnaıy oryn Saıram aýdanyndaǵy Abdýlabad aýylynda ashyldy. Onda bir ýaqytta 400 janýar ustaýǵa jaǵdaı jasalǵan. Eger ıttiń ıesi úsh táýlik ishinde izdep kelmese, janýarlar óltiriledi. Ol úshin burynǵydaı Bekker shuńqyrlary emes, arnaıy peshter qoldanylady. Jalpy qańǵybas ıtter men mysyqtardy joıýǵa bıýdjetten 49 mıllıon teńge bólindi. Qazir munda 300 ıt bar. Olardy ustaýǵa memleket 15 mıllıon teńge bóldi, bir ıtke táýligine 1721 teńge jumsalady.Jyl basynan beri 23 myń ıt aýlandy. Mamandardyń aıtýynsha janýarlardy ýaqytsha ustaý orny Shymkentte bekitilgen janýarlardy ustaý erejelerine sáıkes ashylǵan. Mundaı erejeler Astana jáne Almaty qalalarynda áldeqashan qoldanysqa engen. Endi Shymkent olardyń tájirıbesin qabyldap jatyr.
