Shymkentte qam kesekten salynǵan úılerdiń birqatary súriledi
ShYMKENT. QazAqparat - Shymkentte qam kesekten salynǵan turǵyn úılerdiń birqatary súriledi. «Qoshqar ata» ózeni boıyndaǵy irgetasy joq úılerdiń ornyna zaman talabyna saı kópqabatty turǵyn úıler salynady. Osy máseleni túbegeıli sheshý úshin jýyrda qala bıligi «Shańyraq» baǵdarlamasyn bekitti, dep habarlaıdy QazAqparat HAA tilshisi.
Aldaǵy kezde elimizdegi úshinshi megapolıs sanalǵan qalada kópqabatty turǵyn úılerdiń sany artady dep kútilýde. Qazir, sala mamandary qalada qulaýǵa shaq turǵan úılerdiń sanyn anyqtap jatyr.
«Bizdiń maqsatymyz - eski úılerdiń barlyǵyn súrip, ornyna jańa kópqabatty turǵyn úıler salýymyz qajet. Sóıtip, sol jerde turǵan adamdardyń eski úıleriniń sharshy metrine sáıkes, qaıtarymsyz páter beremiz», - dedi qala ákimi Ǵabıdolla Ábdirahymov.
Qazir, aýqymdy jobany júzege asyrýǵa ınvestorlar qarastyrylyp jatyr. Qyzyǵýshylyq tanytqan kompanııa ákimdikten kelisim-shartqa otyrady. Qalany qaıta jańǵyrtý isinde «eski shahardaǵy» saýda oryndary da ilikti. Mundaǵy qurylys zattaryn satatyn dúkenderdiń barlyǵy qala syrtyna kóshirilmekshi.
«Úlken dańǵyl joldyń boıynda jasyl dúńgirshekter tur. Jekemenshik nysandardy buzýǵa 1 jyl buryn tapsyrma bergen bolatynmyn. Ony qojaıyny eskermedi. Biraq, sol nysandardy barlyǵymyz kórip júrmiz. Nege eshkim shara qoldanbaıdy. Onyń ústine, jaıaý júrginshiler jolynyń dál ústine salynǵan. Sondyqtan, biz ony buzamyz», - dedi qala basshysy.
Sondaı-aq, kezinde jaıaý júrginshiler jolyna salynyp ketken nysandar da shetinen buzylatyn boldy. Jergilikti bıliktiń pármenimen Dinmuhammed Qonaev dańǵyly taǵy birneshe shaqyrymǵa uzartylady. Kezeń-kezeńimen iske asatyn joba 7 jylǵa josparlanǵan. Bıyl 508 shaqyrymdyq jol salynady. Ol úshin eski shahar aýmaǵyndaǵy 74 jeke turǵyn úı buzylmaqshy.
«Qazir birinshi kezeńniń jobalaý smetalyq qujattary daıyndaldy. Qazir, tıisti saraptamadan ótip jatyr. Sol bitken soń qarjy bolatyn bolsa, jumysty bastaımyz», - deıdi qalalyq sáýlet jáne qurylys bólimi basshysynyń orynbasary Serik Kenjalın.
