Shymkentte qalyń qardan bastyrmanyń shatyry qulap, kólikti basyp qaldy
Oqıǵa búgin Soltústik - Batys shaǵyn aýdanyndaǵy Órkendi kóshesi boıynda ornalasqan jer úıde bolǵan. Aýlada ornalasqan bastyrmanyń shatyry qalyń qardy kótere almaı qulap, astynda turǵan «Leksýs» avtokóligin basyp qalǵan. Oqıǵa ornyna barǵan jedel-qutqarý jasaǵynyń sarbazdary arnaıy gıdravlıkalyq quraldy qoldana otyryp, avtokólikti úıindiniń astynan alyp shyqty.
Búgin kúnniń jylýynan Shymkenttegi qalyń qar erip jatyr. Sondyqtan Tótenshe jaǵdaılar departamentiniń mamandary turǵyndardy úı irgesinde júrmeý kerektigin eskertýde. Sebebi, tóbeden muz ben qar qulap, jazataıym oqıǵa bolýy yqtımal.
«Qala aýmaǵynda 26 sm qar jaýǵan. Ǵımarattardyń tóbesinde kóp mólsherde qar men muz jınalǵan. Sondyqtan úı irgesinde júrmeńiz, shatyrlardyń astyna turmańyz, kólikterdi qurylys aýmaǵyna qoımańyz, qaýipti jerlerdi aınalyp ótińiz, elektr jelileriniń astynda turýǵa bolmaıdy»-delingen Shymkent qalasy TJD qoǵammen baılanys toby taratqan aqparatta.
Foto Shymkent TJD