Shymkentte qalalyq muraǵattyń jańa ǵımaraty ashyldy
ShYMKENT. QazAqparat - Shymkentte qalalyq muraǵat ǵımaraty ashyldy. Bul týraly Ońtústik Qazaqstan oblysy ákiminiń baspasóz qyzmetinen habarlaıdy.
Qaladaǵy «Nursát» shaǵyn aýdanynan oryn tepken jańa ǵımarattyń qurylysyna oblystyq bıýdjetten 525 mıllıon teńge qarajat bólingen. Zamanaýı úlgide turǵyzylǵan ǵımarattyń jalpy qorynda 100 myńǵa jýyq jeke qujat saqtalǵan. Jalpy syıymdylyǵy 500 myń saqtaý birligine arnalǵan shymkent qalasynda ashylǵan jańa muraǵat qoımasyna taǵy da 400 myń qujat syıady. Shymkent qalalyq muraǵat mekemesi 1992 jyly qurylǵan. Muraǵattyń alǵashqy qurylǵan jyldarynda qajetti qural jabdyqtar men qujat saqtaıtyn qoıma, maman jetispeýshiligi sııaqty qıynshylyqtar boldy. Qazirgi tańda oblystaǵy nysandarda barlyq jaǵdaı jasalǵan. Olar kerekti qural-jabdyqtarmen jáne kompıýterlermen qamtamasyz etilgen.
Bıyl Ońtústik Qazaqstan óńirindegi Sozaq, Túlkibas jáne Maqtaral aýdandaryndaǵy muraǵat mekemeleri kúrdeli jóndeýden ótken bolatyn. Aıta ketý kerek, Ońtústik Qazaqstan oblysynyń muraǵat qyzmetine kelesi jyly 90 jyl tolady. Qazirgi tańda oblys boıynsha 19 memlekettik muraǵat mekemesi bar. Mundaǵy qujattardy saqtaý qorlary jyl saıyn 30 myń birlikke artýda.
