Shymkentte qala turǵyndaryn urylardan saqtandyratyn erekshe bılbordtar paıda boldy
ShYMKENT. QazAqparat - Shymkentte qala turǵyndaryn urylardan saqtandyratyn erekshe bılbordtar paıda boldy. Shahardyń ortalyq kósheleri men shaǵyn aýdandarynda ilinip turǵan taqtaıshalar jurtty eleń etkizedi. «Saq bolyńyz, ury uıqyda jatpaıdy» nemese «Ury, oılan! Ómir býmerang», «5 jyl qamaýda otyrdym, endi qalamaımyn», «Urlyqqa joq deımiz» degen mátinder jazylǵan bılbordtar qala prokýrorlarynyń tapsyrysymen jasalypty, dep habarlaıdy QazAqparat HAA tilshisi.
Belgili bolǵandaı, Qarataý aýdandyq prokýratýrasy «Shymkent - qaýipsiz qala» jobasynyń aıasynda osyndaı sharany qolǵa alyp, qala turǵyndaryn urylardan saqtanýǵa úgittegen. Bul týraly prokýratýra qyzmetkerleri Feısbýk áleýmettik jelisindegi resmı paraqshasynda aqparat bergen.
«Qurmetti qala turǵyndary! Oblys prokýratýrasynyń bastamasymen basqa da jergilikti atqarýshy jəne ishki ister organdarymen birlesip iske asyrylyp jatqan «Shymkent - qaýipsiz qala» jobasynyń aıasynda Qarataý aýdany prokýratýrasymen Shymkent qalasynyń aýmaǵynda ýaqtyly boıǵa oı jınap, urlyq sııaqty zańsyzdyqqa, qala turǵyndarynyń saqtyǵyn saqtaýǵa jáne túrli zań buzýshylyq túrlerine jol bermeýine baǵdar bolýǵa arnalǵan is-əreketterge kóńil bóletin bılbordtar ilindi», delingen paraqshada.
Qarataý aýdandyq prokýratýra qyzmetkerleri osyndaı bılbordtar ilý urlyq qylmysymen kúresýdiń bir joly bolatynyna senimdi. Óıtkeni ótken jyldyń qorytyndysy boıynsha dál osy Qarataý aýdanynda qylmys sany eń kóp tirkelip, onyń ishinde úıdi tonaý derekteri kóbeıgen bolatyn.
