Shymkentte qala kúnine oraı alǵashqy mýnıtsıpaldy avtobýs parki ashyldy
Qala ákimi Ǵabıdolla Ábdirahymov áleýmettik nysannyń ashylý saltanatyna qatysyp, parkti aralap kórdi. Munda janarmaı beketi, servıstik ortalyq, avtojýý qyzmeti, park qyzmetkerlerdiń jataqhanasy, medpýnkt jáne júrgizýshilerge arnalǵan ashana da qarastyrylǵan. Barlyq talaptarǵa jaýap beretin zamanaýı jańa avtobýs parkimen tanysqan qala basshysy bul jobanyń qoǵamdyq kólikterdiń kedergisiz jáne sapaly jumysyn qamtamasyz etetinin atap ótti.
«Biz turǵyndarǵa bergen ýádemizdi oryndadyq. 300 avtobýs keldi. Qoǵamdyq kólik - qaladaǵy eń ózekti máselelerdiń biri. Jyl sońyna deıin 700 avtobýs keledi. Sol kezde qoǵamdyq kólikpen baılanysty másele sheshiledi. Jalpy, qalada qoǵamdyq kólik salasyn reformalaý bastaldy», - dedi Ǵabıdolla Ábdirahymov.
Aıta keteıik, jobanyń operatory bolyp «Shymkent» áleýmettik-kásipkerlik korporatsııasy» AQ anyqtalyp otyr. Al, áriptesteri retinde «BRK-Lızıng» AQ men «SaryarqaAvtoProm» AQ belgilengen. Jalpy quny 31 mlrd teńge bolatyn jobanyń 20% jergilikti bıýdjetten tólense, 80% «BRK-Lızıng» AQ esebinen qarjylandyrylǵan. Sondaı-aq, joba aıasynda jol aqysyn tóleýdiń «Ońaı» elektrondyq júıesin ornatý josparlanýda.
Qaladaǵy avtobýstardy jańalaý úshin atalǵan park jyl sońyna deıin jańa 1000 avtobýspen tolyqtyrlady. Búgingi kúni josparlanǵan 300 jańa avtobýstyń 160-y jetkizilse, qalǵan 140 avtobýs shilde aıynda jetkiziletin bolady. Qazaqstanda qurastyrylǵan jańa avtobýstar salqyndatqyshtarmen, pandýstarmen, beınekameralarmen, jolaýshylar aǵynynyń datchıkterimen, GPS-trekerlermen jabdyqtalǵan.
Avtobýstyń jalpy syıymdylyǵy 56 adam, uzyndyǵy 8,5 metrdi quraıdy. Atalǵan parkten qala kúnine oraı 138, 153 baǵyttaǵy avtobýstar jolǵa shyqty.
