Shymkentte qala kúni merekesine oraı uıymdastyrylǵan báıgeniń jeńimpazy avtokólik utyp aldy
ShYMKENT. QazAqparat - Shymkentte qala kúni merekesin atap ótý bastalyp ketti. Іs-shara aldymen oqýshylardyń sherýimen bastaldy, dep habarlaıdy QazAqparat tilshisi.
Ál-Farabı alańynda ótken erekshe sherýdi Ońtústik Qazaqstan oblysynyń ákimi Janseıit Túımebaev pen Shymkent qalasynyń ákimi Ǵabıdolla Ábdiraxymov jáne elaǵalary men shahar turǵyndary tamashalady. Alańǵa jınalǵan óner mektebiniń shákirtteri, mýzyka jáne horeografııa ujymdary men jas sportshylar merekelik sherýmen júrip ótti. 1500-den astam oqýshy qatysyp, sap túzegen is-sharany qala jáne óńirimizdiń turǵyndary tamashalady. Aıta ketý kerek, merekelik ár sherý ár taqyrypqa arnaldy.
Budan keıingi is-shara atshabarda ótti. Munda alaman báıgesi uıymdastyryldy. Oblystyq ulttyq sport túrleri mektebiniń muryndyq bolýymen ótken báıgege osy mekteptiń óńirimizdiń aýdan-qalalarynan kelgen jas shákirtteri qatysty. 16 shaqyrymǵa sozylǵan báıge jeńimpazdaryn oblys ákimi Janseıin Túımebaev marapattap, júldelerin tabys etti. Aıta keteıik, alaman báıgeniń jeńimpazy atanǵan shabandoz Smaıl Jeńiske bas júldege tigilgen "Nıva" avtokóligi tartý etilse, ekinshi oryn alǵan Jasulan Turǵanbaevqa - 450 myń teńge, al úshinshi oryn ıegeri Alık Nurmahanbetovqa 300 myń teńge aqshalaı júldeniń sertıfıkaty tabys etildi. Aıta keteıik, qala kúni merekesine 30 myńnan astam adam qatysýda. Mereke keshkilik gala-kontsertpen jalǵasatyn bolady.
