Shymkentte iz-túzsiz joǵalyp ketken áıeldiń máıiti sýdan tabyldy

ShYMKENT. QazAqparat – Shymkentte malyn izdep shyǵyp, iz-túzsiz joǵalyp ketken áıel sýǵa batyp ketken. 45 jastaǵy turǵynnyń máıitin qutqarýshylar Jylanbuzǵan aýylyndaǵy sý arnasynan tapty, dep habarlaıdy QazAqparat tilshisi.

Shymkent qalasyna qarasty Eńbekshi aýdany, Jylanbuzǵan aýylynyń turǵyny malyn izdep shyqqan. Alaıda úıine oralmaǵan soń týystary 112 nómirine habarlaǵan. Oqıǵa ornyna polıtseıler men qutqarýshylar baryp, bir táýlikten astam izdeý jumystaryn júrgizdi. Olarǵa eriktiler men aýyldastary da kómektestken.

«Oqıǵa ornyna 7 adam men 1 kınologııalyq brıgadadan turatyn jedel-qutqarý jasaǵy shyqty. Olar Jylanbuzǵan aýylynyń janynan ótetin eni 3 metr, tereńdigi 2-2,5 metr bolatyn sý arnasyn qarap shyqqan. Nátıjesinde súńgýirler 1977 jyly týǵan áıeldiń máıitin sýdan shyǵaryp aldy» delingen qalalyq TJD habarlamasynda.