Shymkentte iz-túzsiz joǵalǵan balalar úıiniń tárbıelenýshileri tabyldy
ShYMKENT. QazAqparat - Shymkentte iz-túzsiz joǵalyp ketken balalar úıiniń tárbıelenýshileri tabyldy. Kámelet jasyna tolmaǵan eki qyz qurylys nysandarynyń birinde qydyryp júripti, dep habarlaıdy QazAqparat HAA tilshisi oblystyq ІІD baspasóz qyzmetine silteme jasap.
Belgili bolǵandaı, Qarataý aýdandyq ІІB-ne qaladaǵy balalar úıiniń qyzmetkeri aryzdanǵan. Ol 15 jáne 16 jastaǵy jasóspirim qyzdardyń eshkimge eskertpesten, belgisiz jaqqa ketip qalǵanyn aıtqan. Osydan keıin jedel-izdestirý sharalaryn uıymdastyrǵan polıtseıler kýágerlerdi surastyryp, balalar úıine jaqyn mańdaǵy aýmaqty túgel tekserip shyǵady. Nátıjesinde, aıaqtalmaǵan qurylys nysandarynyń birinen eki qyz da tabyldy. Qos qurby dostarymen qydyryp qaıtpaqshy bolypty.
Aıta keteıik, polıtseıler jyl basynan beri óńirde iz-túzsiz joǵalǵan 8 jasóspirimdi taýyp, úılerine qaıtarǵan. Ádette jetkinshekter úıdegi urys-keris saldarynan, ne bolmasa qyzyq kórip ketip qalady eken. Keıinnen keleńsiz ne qylmystyq jaǵdaılarǵa tap bolady. Biraq tártip saqshylary balalar kóbinde bir táýlik ishinde tabylatynyn aıtady.
