Shymkentte ınnovatsııalyq ýnıversıtet salynady
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Shymkenttegi birqatar nysandarda bolyp, ondaǵy atqarylyp jatqan jumystarymen tanysty, dep habarlaıdy oblys ákimdiginiń baspasóz qyzmeti.
Eń aldymen aımaq basshysy «Agrobıznes 2020» baǵdarlamasy boıynsha iske asyrylǵan kókónis ósiretin «SMG Greenhouse profit» JShS-nyń jylyjaı keshenin aralap kórdi. Tórt gektardan astam aýmaqty quraıtyn óndiristik keshen Túrik jáne Gollandııa memleketinen ákelingen qural jabdyqtarmen qamtylǵan. Zaman talabyna saı sońǵy úlgidegi jylyjaıda jylyna 1 myń tonnadan astam qııar óndirlýde.
Seriktestik mamandarynyń aıtýynsha, munda búginde aptasyna 29-30 tonna kókónis ónimderi jınalyp, Qazaqstan men Reseıdiń Ekaterınbor,Omby oblystarynyń naryǵyna shyǵarylýda. Sondaı-aq, olar búginde 45 adam eńbek etetin aýyl sharýashylyǵy keshenininiń kólemin taǵy da 4 gektarǵa ulǵaıtýdy josparlap otyrǵanyn jetkizdi.
Jylyjaı jumysymen, munda eńbek etetin jumysshylardyń jaǵdaıymen tanysqan oblys ákimi óndiriletin ónimdi eń aldymen ishki naryqqa, sosyn shekaralas jatqan Ózbekstan men Qyrǵyzstan memleketine eksporttaý jaıyn qarastyrýdy, jumysshylardyń jalaqysyn múmkindiginshe joǵarlatýdy tapsyrdy.
Sapary barysynda óńir basshysy elimizdegi óndiristik tájirıbesi joǵary «Standart Tsement» JShS-nyń jumysyn kórdi. Atalǵan kásiporyn - óndiristik qýattylyǵy jylyna 2 mln tonna tsement shyǵaratyn Qazaqstandaǵy jalǵyz iri zaýyt. Kásiporynda ekologııalyq talaptardy saqtaıtyn zamanaýı qurylǵylar ornatylǵan. Osylaısha qorshaǵan ortaǵa eshqandaı zııan keltirmesten úlken kólemde jáne joǵary sapaly tsement óndirip keledi.
Búgingi kúni 1 100-den astam adam eńbek etetin kompanııada jyl saıyn jumys oryndarynyń sany artyp keledi. Sonymen qatar, kásiporyn óńirdiń áleýmettik-ekonomıkalyq ósýine óz úlesterin qosýda.
Ákim bastaǵan jumysshy top Shymkent qalasynyń ákimshilik-iskerlik ortalyǵynda salynyp jatqan 8 myń oryndyq meshittiń qurylysyn aralap kórdi. Meshit kesheninde avtokólik qoıýǵa arnalǵan parkıng, kúnnen qýat alatyn qurylǵylar qoıylady. Meshit aldyndaǵy on myńnan astam adamǵa eseptelingen alańda jamaǵatty kúnnen, jaýyn-shashynnan qorǵaý úshin shatyr bolyp ashylatyn júıe qoıylady. Munda sonymen qatar, musylmandyq joralardy jasaıtyn oryndar, kongress-holl, tamaqtanýǵa arnalǵan zal, neke saraıy, ıslamdyq bilim berý ortalyǵy, medirese, kitaphana men ákimshilik bólmeler salynady.
Osy kúni J.Túımebaev ınnovatsııalyq - tehnologııalyq kolledjinde bolyp, oqý ornynyń jumys barysymen tanysty. Kolledjde búginde 9 mamandyq boıynsha jalpy 970 stýdent bilim alady. Al mundaǵy 122 stýdent 4 mamandyq boıynsha 2011 jyldan beri dýaldy oqytý júıesiniń eksperımenttik rejıminde bilimin shyńdaýda.
Oqý ornynyń tynys-tirshiligin baıandaǵan kolledj dırektory Shymkent qalasyndaǵy «Bozaryq» shaǵynaýdany aýmaǵynan boı kóteretin «Qazaq ınnovatsııa» ýnıversıtetiniń maketimen tanystyrdy. Jańa ýnıversıtet qalashyǵyna búginde 150 gektar jer bólinip, sáýlettik-qurylys jobasy bekitlgen. 10 myń stýdentke shaqtalyp salynatyn joǵarǵy oqý ordasynda medıtsına, hımııa-tehnologııa, joǵarǵy bıznes mektebi baǵyttary boıynsha bilim beretin bolady. Sondaı-aq, oqý orny aýmaǵynan turǵyn úıler salynyp, áleýmettik nysandar salynady.
