Shymkentte ınfraqurylym júıeleri tsıfrlandyrylyp jatyr

ShYMKENT. QazAqparat – Shymkent kóshelerindegi ınfraqurylym júıeleri tsıfrlandyrylyp jatyr. Bul týraly aqparattyq-kommýnıkatsııalyq ortalyǵynda ótken brıfıngide qala ákiminiń orynbasary Maqsut Isahov málimdedi, dep habarlaıdy QazAqparat tilshisi.

Shymkent kóshelerinde geoportal jasalyp jatyr, ıaǵnı jerdiń astyndaǵy jáne ústindegi ınfraqurylym júıeleri tsıfrlandyrylady. Bul, eń aldymen, jóndeý jumystaryn júrgizetin mekemer úshin tıimdi bolmaq. Sondaı-aq, joba tolyqtaı iske qosylǵanda turǵyndar da jańadan salǵan ǵımarattaryna ınfraqurylym júıesin qınalmaı tarta alatyn bolady.

«Geoportal bolmaǵandyqtan, kóshelerdi qazyp, jóndeý jumystaryn júrgizgende keı júıeler úzilip ketip jatady. Sondyqtan, osy aýqymdy jobany júzege asyrýda qolǵa aldyq. Qazir búkil qaladaǵy júıelerdi lazermen túsirý jumystary aıaqtalyp qaldy. Mamyr aıynda tolyqtaı bitiremiz. Elektrondy túrde jasalǵan portaldy kez kelgen qala turǵyny paıdalana alady. Onda qaı jerde sý júıesi, gaz qubyry, elektr symy ótkendigi anyq kórinip turady. Tipti, qubyrdyń qandaı materıaldan jasalǵany, elektr symdarynyń qalyńdyǵyna deıin kórsetiledi», - dedi Maqsut Isahov.