Shymkentte ındýstrıaldy aımaqta ǵımarat opyryla qulap, úsh adam qaza boldy
ShYMKENT. QazAqparat - Shymkentte «Ordabasy» ındýstrıaldy aımaǵyndaǵy bes qabatty zaýytta temir-beton plıtalarynyń jabyndysy qulap, ishinde júrgen úsh adamdy basyp qalǵan, dep habarlaıdy QazAqparat tilshisi.
Qalalyq TJD baspasóz qyzmetiniń málimetinshe, «112» basqarý pýltine kúndizgi saǵat 14:43-te shuǵyl habarlama túsken. Qapal batyr tas jolynda ornalasqan «Ordabasy» ındýstrıaldy aımaǵynan habarlama kelip túsken. Jalpy aýdany 2000 sharshy metrdi quraıtyn ǵımarattyń qaraýsyz qalǵany anyqtalǵan.
Oqıǵa ornynda avarııalyq-qutqarý jumystaryna jedel-qutqarý jasaǵynyń qutqarýshylary, 1 kınologııalyq top jumyldyrylǵan. TJ departamentiniń 18 qyzmetkeri men 1 kınologııalyq esebi, Apattar medıtsınasy ortalyǵy fılıalynyń 1 brıgadasy jumyldyryldy. Osy qyzmetkerler men qyzmettik ıtterdiń kómegimen úıindilerdiń astynan 1967 j.t., 1992 j. t. jáne 1999 j. t. 3 er adamnyń denesi tabylǵan. Qazirgi ýaqytta qaıǵyly jaǵdaıdyń sebep-saldary tekserilip, anyqtalýda. Quzyrly organdar tarapynan tergeý amaldary júrgizilip jatyr.
