Shymkentte ІІІ Paralımpıada oıyndary ótedi
ALMATY. 30 qyrkúıek. QazAqparat /Erlik Erjanuly/ - Shymkentte 5-9 qazan kúnderi ІІІ Paralımpıada oıyndary bolady. Onda elimizdiń túkpir-túkpirinen kelgen 507 sportshy sporttyń 6 sport túri boıynsha ózara saıysqa túspek. Júzý, parýerlıftıng, oq atý, jeńil atletıka, otyryp oınıatyn voleıbol men ústel tennısi boıynsha ótetin bul dodada 523 medaldar jıyntyǵy sarapqa salynǵaly otyr.
Ony Týrızm jáne sport mınıstrligi, Ońtústik Qazaqstan oblysynyń ákimdigi, "Nur Otan" HDP jáne QR Ulttyq Paralımpıadalyq komıteti birlesip uıymdastyrýda. Bul baıraqty báseke 2012 jyly Londonda bolatyn Paralımpıada oıyndarynyń joldamasyn jeńip alýǵa daıyndyq kezeńi sanalady.
Jalpy І Paralımpıada oıyndary 2001 jyly Astana qalasynda ótken edi. Onda jalpy esepte astanalyqtar úzdik shyqty. Odan keıin 2007 jyl Taldyqorǵanda bolǵan ІІ Paralımpıada oıyndarynda almatylyqtardyń mereıi ústem shyqty. Onda 2-3 oryndy Qaraǵandy oblysy men Astana qalasynyń komandasy bólisken edi. Bıyl Astana, Almaty qalalary men 14 oblys mamyr-qyrkúıek aılarynda aımaqtyq irikteý jarystaryn ótkizip, onyń qorytyndysy boıynsha óz komandalaryn jasaqtaǵan bolatyn. QR Shtattyq ulttyq komandalar jáne sport rezervi dırektsııasynyń baspasóz qyzmeti taratqan habarlamaǵa qaraǵanda, oǵan 2500-ge jýyq sportshy qatysqan.
