Shymkentte gúlzarlar jańartylýda
ShYMKENT. QazAqparat - Shymkentte qoǵam qaıratkeri Asanbaı Asqarovtyń esimimen atalatyn gúlzar men Keńes Odaǵynyń Batyry Álııa Moldaǵulovanyń eskertkishi turǵan alleıada qaıta qurý jumystary júrgizilýde, dep habarlaıdy QazAqparat tilshisi.
Qalalyq ákimdiktiń málimetinshe, qazirgi tańda Asanbaı Asqarov eskertkishi mańynda jóndeý jumystary bastalǵan. Onda tozyǵy jetken oryndyqtar aýystyrylyp, aınalasyndaǵy jasyl jelekti sýarý úshin arnaıy uńǵyma qazylýda. Bıyl jyl sońyna deıin munda jańa kóshetter otyrǵyzylyp, kóktemde kógaldandyrý bastalady dep josparlanyp otyr.
Al, «Kómeshbulaq» bazary mańyndaǵy Álııa Moldaǵulovanyń eskertkishi turǵan alleıada qaıta qurý jumystary aıaqtalýǵa jaqyn. Tozyǵy jetken eskertkish tuǵyry qymbat tastarmen árlenýde. Bul jumystar taıaý kúnderi aıaqtalady dep kútilýde. Aıta keterligi, kóriktendirý jumystary jergilikti turǵyndardyń kóńilinen shyǵyp otyr.
