Shymkentte Gete atyndaǵy saıabaq salynbaq
ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev Germanııa Federatıvti Respýblıkasynyń Qazaqstandaǵy tótenshe jáne ókiletti elshisi Rolf Mafaelmen kezdesti, dep habarlaıdy ákimniń baspasóz qyzmeti.
Kezdesý barysynda qos tarap ózara yntymaqtastyq tetikteri jaıyn talqylap, ekijaqty qatynastardy damytý týraly pikir almasty.
Óńir basshysy Germanııany Qazaqstannyń Eýropadaǵy saıası jáne ekonomıkalyq áriptesi dep sanaıtyndyǵyn, barlyq salada yntymaqtastyq baılanysty damytýǵa yntaly ekendigin jetkizdi. Sondaı-aq, ákim bıylǵy jyldyń 9 aıynda Ońtústik Qazaqstan oblysy men Germanııa arasyndaǵy taýar aınalymy 30 mln AQSh dollaryna jetip, onyń 27 mln dollaryn ımport qurap otyrǵanyna toqtaldy.
«Germanııa - Qazaqstannyń negizgi saýda áriptesi. Ekijaqty qarym-qatynastar tájirıbesi Germanııanyń senimdi seriktes ári turaqty ınvestor ekendigin ańǵartady. Biz germanııalyq ınvestorlardyń jańa tehnologııalar ákelip birlesken óndiris oryndaryn ashý úshin bar múmkindikterdi jasaýǵa daıynbyz. Búginde óńirimizde ınvestorlarǵa tıimdi jaǵdaılar jasalyp otyr. Ońtústik Qazaqstan oblysynyń geografııalyq turǵydan tıimdi ornalasýy - aımaǵymyzǵa ınvestıtsııa tartý úshin oń jaǵdaıdy qalyptastyrady. Men osy rette germandyq kásipkerlermen tyń jobalardy iske asyrýǵa múddeli ekendigimizdi jetkizgim keledi. Sondyqtan sizderdi ekonomıkamyzdyń túrli salasynda birlesip eńbek etýge shaqyramyn», - dedi Janseıit Qanseıituly.
Óz kezeginde nemis elshisi Ońtústik Qazaqstan oblysy Eýroodaq elderiniń qyzyǵýshylyǵyn oıatqan ekonomıkalyq aımaq ekenin atap ótti.
«Bıyl Qazaqstan men Germanııanyń arasynda dıplomatııalyq qatynastyń ornatylǵanyna 25 jyl tolyp otyr. Búginde biz qazaq-nemis qatynasy joǵarǵy damý deńgeıine jetkeniniń kýási bolyp otyrmyz. Eki el arasyndaǵy yntymaqtastyqty arttyrýda Ońtústik Qazaqstan oblysynyń da qosyp otyrǵan úlesi mol. Sizderdiń óńirlerińiz agrarlyq aımaq sanalǵandyqtan aldaǵy ýaqytta osy jáne mádenıet, bilim, densaýlyq saqtaý salalaryndaǵy yntymaqtastyqty arttyrýǵa kúsh salatyn bolamyz», - dedi Rolf Mafael.
Aıta keteıik, búginde Ońtústik Qazaqstan oblysynda germanııalyq áriptesterdiń qatysýymen birqatar óndiris oshaqtary jumys isteıdi. Olardyń qatarynda «Promondıs Kazahstan», «ODDESSEZentralsien» JShS-lary men «Shymkenttsement» AQ da bar.
Kezdesý barysynda oblys ákimi elshige Elbasynyń «Bolashaqqa baǵdar: rýhanı jańǵyrý» baǵdarlamasy aıasynda óńirimizde týrızmdi damytýǵa erekshe kóńil bólinip otyrǵanyn jetkizdi. Osy rette óńir basshysy nemistiń uly aqyny Gete men qazaqtyń uly kemeńgeri Abaıdyń rýhanı baılanysyna toqtalyp, Geteden aýdaryp, ánge ulastyrǵan qazaq aqynynyń «Qarańǵy túnde taý qalǵyp» óleńin jatqa oqyp berdi. Sondaı-aq ákim eki el arasyndaǵy mádenı baılanystardy nyǵaıtý maqsatynda aldaǵy ýaqytta Shymkentte Gete atyndaǵy saıabaqtyń irgetasy qalanatatynyn jetkizdi.
