Shymkentte gazben jylytylatyn barlyq úıler tekseriledi
ASTANA. QazAqparat - Shymkentte gazben jylytylatyn barlyq úıler tekseriledi. Bul týraly búgin Úkimettiń selektorlyq rejimdegi otyrysynda Ońtústik Qazaqstan oblysynyń ákimi Janseıit Túımebaev málim etti, dep habarlaıdy QazAqparat.
Ákim deregine sáıkes, jarylystyń oryn alýyna ıranda jasalǵan, sertıfıkattalmaǵan jylý peshin durys paıdalanbaý sebep bolǵan. Apat oryn alǵannan keıin jedel qutqarý jumysy uıymdastyrylyp, úıindi astynan atalǵan baspanada turyp jatqan 5 adam shyǵarylǵan.
«Oqıǵa ornynda 1988 jyly dúnıege kelgen Sabına Orynbaevanyń máıiti shyǵaryldy. Bir adam ortasha kúıik shalyp, 2 adam túrli dene jaraqatymen aýrýhanaǵa jetkizildi. Zardap shekkenderdiń jaı-kúıi turaqty. Olarǵa medıtsınalyq kómek kórsetildi. Aýrýhanadan shyqqanan keıin ýaqytsha baspana beriledi. Buǵan qosa, jergilikti bıýdjet qarjysy esebinen áleýmettik qoldaý kórsetiledi. Sonymen qatar oblys, qala ákimdiginiń jáne «Nur Otan» partııasy fılıalynyń qyzmetkerleri birkúndik jalaqylaryn aýdarady», - dedi Túımebaev.
Onyń aıtýynsha, atalǵan fakti boıynsha arnaıy komıssııa quryldy. Onyń jumys qorytyndysyna sáıkes júıeli sharalar qolǵa alynady.
«Búgingi kúni oqıǵa orny qurylys qoqystarynan tolyqtaı tazartyldy. Tolyqtaı alǵanda, mundaı jaıttyń qaıtalanýyn boldyrmaý úshin barlyq úılerdiń, saraılardyń, baraktardyń tizimi jasalyp, tekseriletin bolady.
Esterińizge sala ketsem, qazirgi ýaqytta Shymkent qalasynda 2040 kópqabatty úı, 218 myń jeke turǵyn úı bar. Barlyq úı-jaılarda gaz jáne basqa da jylý qurylǵylaryn paıdalaý barysyndaǵy tehnıkalyq qaýipsizdik tekseriletin bolady. Tolyqtaı alǵanda jaǵdaı turaqty», - dedi ákim.
