Shymkentte etnos ókilderi jańarǵan álipbımen dıktant jazdy
Assambleıasynyń biryńǵaı kúni jáne «Rýhanı jańǵyrý» baǵdarlamasy aıasynda uıymdastyrylǵan sharaǵa qaladaǵy etnomádenı birlestikterdiń jastar qanattarynyń, oqý oryndaryndaǵy «Dostyq» klýbtarynyń músheleri qatysty, dep habarlaıdy QazAqparat tilshisi.
Dıktant jazý barysynda jastardyń jańarǵan álipbıdi qanshalyqty meńgergeni baıqaldy. Óıtkeni qatysýshylar bul sharaǵa aldyn ala daıyndalǵan bolatyn.
«Qazaqstan halqy Assambleıasynyń «Myń bala» mádenı-aǵartý jobasy aıasynda etnos jastaryna qazaq tilin úıretý sharalary turaqty uıymdastyrylyp keledi. Búgingi ashyq dıktant jastardy latyn grafıkasyna negizdelgen qazaq álipbıin saýatty qoldanýdy úıretý maqsatynda ótip otyr. Dıktant taqyryby «2019 – Jastar jylyna» arnaldy. Nátıjesinde qatysýshylardyń basym bóligi latyn grafıkasyn jetik meńgergendigin baıqatty. Atalǵan aktsııany budan keıin de jalǵastyrý josparda bar«, - deıdi Shymkent qalalyq «Qoǵamdyq kelisim» KMM-nyń bólim basshysy Mádı Besbaev.
